माधवकुमार नेपाल प्रचण्डको मामुली कार्यकर्तामात्र : ओली

काठमाडौं– प्रधानमन्त्री तथा नेकपाका अध्यक्ष केपी ओलीले माधवकुमार नेपाल पुष्पकमल दाहालको मामुली कार्यकर्तामात्र भएको टिप्पणी गरेका छन्। 

नेकपा ओली समूहले बबरमहलस्थित एक पार्टी प्यालेसमा आयोजना गरेको सुदूरपश्चिम प्रदेशस्तीय अगुवा कार्यकर्ता भेलालाई सम्बोधन गर्दै उनले भने, ‘माधवकुमार नेपालको बारेमा म धेरै टिप्पणी गर्न चाहन्नँ। उहाँ त्यसको लायक नै होइन। उहाँ त प्रचण्डको मामुली कार्यकर्तामात्र हो। उधारो डिल गर्दिनँ भन्नुहुन्थ्यो। अहिले द्वितीय अध्यक्ष पाउनुभएछ।’

प्रचण्ड र माधव नेपाल मिल्दा बहुमत हुन्छ भन्ने जान्दाजान्दै आफूले पार्टी एकता गरेको उनले बताए।

दाहाल–नेपाल समूहलाई लक्षित गर्दै ओलीले भने, ‘डुंगा अगाडि बढ्न नदिने, पछाडि तानिराख्ने काम भइरह्यो। अब उहाँ थाक्नुभयो, डुंगा छाडिदिनुभो, हामी अगाडि बढ्यौं।’

पुष्पकमल दाहाल मान–अपमानको कुरामा अल्झिएको भन्दै ओलीले भने, ‘मान गरेनन्, अपमान गरे भन्नेमा ध्यान छ। त्यति सानो कुरामा ध्यान छ, देश विकासमा केको ध्यान हुन्थ्यो।’