संघर्षरत बार्सिलोनाको अर्को पनि बराबरी

काठमाडौं- स्पेनिस ला लिगाको जारी सिजनमा शीर्ष चारको लागि संघर्षरत क्याटलान क्लबसँग बार्सिलोनाले चौथो बराबरी खेलेको छ।

मंगलबार राति क्याम्प नाउमा सम्पन्न खेलमा बार्सिलोनाले पाहुना टिम आइबरसँग १–१ गोलको बराबरी खेलेको हो।

मार्टिन ब्रेथवेटले पेनाल्टीको अवसर सदुपयोग गर्न नसकेपछि घरेलु टिम सुरुआती अग्रता बनाउनबाट चुक्यो। यससँगै पहिलो हाफ गोलरहित बराबरीमा टुंगियो।

तर, दोस्रो हाफमा भने दुवै टिमले बराबरी गोल गरे। खेलको ५७औं मिनेटमा आइबरका किके गर्सियाले गोल गर्दै खेलमा अग्रता बनाएको थियो। तर, ६७औं मिनेटमा जुनियर फिर्पोको पासमा बार्सिलोनाका ओउसमान डेम्बेलेले गोल गर्दै खेललाई बराबरीमा ल्याए। बार्सिलोनाले जितका लागि अन्य भने गोल गर्न सकेन।

खेलमा फेरि एकपटक कप्तान लियोनेल मेस्सीको अभाव खड्किएको छ। चोटका कारण खेलमा सहभागी नबनेका मेस्सीले प्यारापिटबाट खेल अवलोकन गरेका थिए।
क्रिसमस मनाएर अर्जेन्टिनाबाट मंगलबार बिहान फर्किए पनि उनी खेलमा सहभागी बनेनन्।

जारी सिजनमा राम्रो सुरुआत गरे पनि बार्सिलोना खराब अवस्थाबाट गुज्रिरहेको छ। अंकतालिकामा शीर्षस्थानको एथ्लेटिको भन्दा ७ अंकले पछि परेको बार्सिलोना २५ अंकका साथ छैटौं स्थानमा छ।

बार्सिलोनाले १५ खेलबाट ७ जित र चौथो बराबरीका साथ २५ अंक बनाएको हो। 

उसले चार हारको पनि सामना गरिसकेको छ। यता १५ अंक बनाएको आइबर रेलिगेसन टिमभन्दा एक अंकले माथि छ।

ला लिगामा मंगलबार राति नै सम्पन्न अर्को खेलमा सेभियाले भिल्ला रियललाई २–० गोलले हराएको छ। सेभियाको मैदानमा सम्पन्न खेलमा उसले पाहुना टिमविरुद्ध सहज जित निकालेको हो।

त्यस्तै लेभान्टेले घरेलु मैदानमा रियल बेटिसविरुद्ध ४–३ गोलको जित निकालेको छ।