प्रदेश १ : अल्पमतमा परेका मुख्यमन्त्रीलाई महत्त्वपूर्ण निर्णय नगर्न पत्राचार

विराटनगर– नेकपा (दाहाल–नेपाल) संसदीय दलका उपनेता टंक आङबोहाङले प्रदेश १ का मुख्यमन्त्री शेरधन राईलाई महत्त्वपूर्ण निर्णय नगर्न पत्राचार गरेका छन्। 

अल्पमतमा परेका मुख्यमन्त्री राईलाई दैनिक कामकाजबाहेक अन्य निर्णय नगर्न सचेत गराएको उनले बताए।

मुख्यमन्त्री राई अल्पमतमा परेको भन्दै दूरगामी असर गर्ने खालका निर्णय नगर्न भन्दै पत्राचार गरेको दलका उपनेता आङबोहाङले मंगलबार पत्रकार सम्मेलन गरी जानकारी दिएका छन्। 

मुख्यमन्त्री राईलाई नेकपाको संसदीय दलको नेताको हैसियतले कुनै पनि काम नगर्न पत्रमार्फत आफूले सचेत गराएको उनको भनाइ छ। 

विधानअनुसार बहुमत सदस्यले अविश्वासको प्रस्ताव दर्ता गराइसकेको अवस्थामा संसदीय दलको नेताको हैसियतले राईले काम गर्न नपाउने व्यवस्था रहेको उनको दाबी छ। 

पुस १२ गते नेकपाका ३७ सांसदहरूले संसदीय दलको नेता र मुख्यमन्त्रीबाट हटाउन संसदीय दल तथा  प्रदेशसभामा अविश्वासको प्रस्ताव दर्ता गरेका थिए। 

कांग्रेस नेतासँग छलफल

मुख्यमन्त्री राईविरुद्ध अविश्वासको प्रस्ताव पेस गरिसकेपछि दाहाल–नेपाल समूहले कांग्रेसका नेताहरुसँगको भेटघाट गर्न थालेको छ। 

पछिल्लोपटक नेकपा केन्द्रीय सदस्य तथा निवर्तमान आर्थिक मामिला तथा योजना मन्त्री इन्द्रबहादुर आङ्बो र नेपाली कांग्रेसका नेता डा. शेखर कोइरालाबीच छलफल भएको हो। 

कोइरालालाई भेट्न आङ्बो कोइराला निवास पुगेका थिए। भेट समसामयिक विषयमा केन्द्रित रहेको आङ्बोले बताए। अहिलेको अवस्था र घटनाक्रममा समान दृष्टिकोण भएका दलहरुबीच छलफल भएर अघि बढ्ने कुरामा नेता कोइरालासँग कुराकानी भएको उनको भनाइ छ । 

उनीहरुबीच सत्ता साझेदारीका विषयमा छलफल भए÷नभएको केही खुलाइएको छैन। नेता कोइरालाले यसअघि कांग्रेस सडकबाट निर्वाचनको खबरदारी गर्ने र सत्ता साझेदारीमा नफस्ने बताउँदै आएका छन्।