स्पोर्ट्स अवार्डलाई टर्किस एयरलाइन्सको साथ

काठमाडौं- पल्सर स्पोर्ट्स अवार्डको १७ औं संस्करणमा टर्किस एयरलाइन्स जोडिएको छ।

नेपाल खेलकुद पत्रकार मञ्चले आयोजना गर्ने घरेलु खेलकुद क्षेत्रकै प्रतिष्ठित अवार्डलाई टर्किस एयरलाइन्सले सहप्रायोजकको रूपमा साथ दिने भएको हो।

यस वर्ष हुने १७ औं संस्करणको पल्सर स्पोर्ट्स अवार्ड पुस २८ गते आयोजना हुँदैछ ।

आयोजक संस्था नेपाल खेलकुद पत्रकार मञ्चका महासचिव प्रज्वल ओली र टर्किस एयरलाइन्स नेपालका महाप्रबन्धक अब्दुल्लाह टंकर केसीसीले मंगलबार प्रायोजनसम्बन्धी सम्झाैता पत्रमा हस्ताक्षर गरेका हुन्।

सम्झौताअनुसार सह-प्रायोजकको रूपमा टर्किस एयरलाइन्सले वर्षको पुरुष तथा महिला खेलाडीलाई एयरलाइन्सको सेवा भएको कुनै पनि गन्तव्यमा पाँच लाख रूपैयाँ बराबरको दुईतर्फी हवाई टिकट उपलब्ध गराउने छ।

एयरलाइन्सले आयोजक संस्थाका सदस्यलाई एक वर्ष कायम रहने गरी हवाई टिकटमा १० प्रतिशत छुट दिने समेत सम्झौता पत्रमा उल्लेख छ।

पल्सर स्पोर्ट्स अवार्डमा यस वर्ष समेत विभिन्न १० विधाका खेलाडी तथा खेलकर्मीलाई सम्मान गरिने भएको छ।

आयोजकले अघिल्लो हप्तामात्र पिपल्स च्वाइस विधाको मनोनयन सार्वजनीक गरेको थियो।

पिपल्स च्वाइसमा पौडीकी गौरिका सिंह, करातेका मन्डेकाजी श्रेष्ठ, भलिबलकी अरुणा शाही, बास्केटबलकी सदीना श्रेष्ठ र फुटबलकी सावित्रा भण्डारी परेकी छन्।

यसपटक समेत पिपल्स च्वाइससहित वर्षका उत्कृष्ट खेलाडी पुरुष, महिला, युवा खेलाडी र उत्कृष्ट प्रशिक्षक विधामा पुरस्कृत गरिने छ।

यस्तै, लाइफाटाइम एचिभमेन्ट अवार्ड, पारा एथलिट, स्पेशल अवार्ड र टिम अफ दी इयर अवार्डसहित खेलकर्मीलाई सम्मानित गरिने आयोजक संस्थाले जनाएको छ।