नयाँ कोरोना भाइरस भेटिएपछि बेलायतमाथि थुप्रै देशको प्रतिबन्ध

काठमाडौं- बेलायतमा नयाँ प्रकारको कोरोना भाइरसको संक्रमण फैलिएपछि थुप्रै देशले प्रतिबन्ध लगाएका छन्।

पछिल्लो पटक हङकङले पनि बेलायतमाथि प्रतिबन्ध लगाएको छ। स्वीटजरल्याण्ड, जर्मनी, इटलीलगायतका अधिकांश युरोपेली देशले प्रतिबन्ध लगाइसकेका छन्। ती देशमा बेलायतबाट हुने सबै उडानलाई निशेष गरिएको छ।

आज फ्रान्सले पनि बेलायतको सीमा बन्द गरिदिएको छ। ४८ घण्टाका लागि भन्दै सीमा बन्द गरिदिएपछि सामान बोकेका सयौँ लरीहरु रोकिएका छन् भने पानी जहाज तथा डुंगामा यात्रारत यात्रुहरु अलपत्र परेका छन्। उनीहरु डोबर बन्दरगाहमै रोकिएका छन्।

बेलायतमा नयाँ प्रकारको कोरोना भाइरस भेटिएपछि बेल्जियम, दि आइरिस रिपब्लिक तथा क्यानडाले पनि प्रतिबन्ध लगाउने भएका छन्।

अस्ट्रिया पनि बेलायतमाथि प्रतिबन्ध लगाउने तयारीमा छ भने बुल्गेरियाले हिजो मध्येरात देखि नै बेलायतका सबै उडान निषेध गरिदिएको छ।

बेलायतमा गत २४ घण्टामा ३५ हजार ९२८ नयाँ संक्रमित थपिएका छन्।

बेलायतका स्वास्थ्य मन्त्री म्याट ह्यानककले नयाँ प्रकृतिको कोरोना भाइरस निकै शक्तिशाली रहेको र यसको संक्रमण फैलिने दर ७० प्रतिशतसम्म रहेको बताएका छन्।