लेवान्डोस्कीको गोलले बायर्न बुन्डेसलिगाको शीर्षस्थानमा

काठमाडौं– जर्मन बुन्डेसलिगा अन्तर्गत शनिबार राति सम्पन्न खेलमा जित निकाल्दै बायर्न म्युनिक शीर्षस्थानमा उक्लिएको छ।

लिभरकुसनको घरेलु मैदानमा सम्पन्न खेलमा बायर्नले पुनरागनम जित निकालेर शीर्षस्थानमा रहने अवसर पाएको हो।

त्यसभन्दा पहिले शीर्षस्थानमा रहेको लिभरकुसनलाई बार्यनले २–१ गोलले हराउँदा दुवै गोल फिफा वर्ष उत्कृष्ट खेलाडी रोबर्ट लेवान्डोस्कीले गरे।

एक गोलले पछि परेको अवस्थाबाट लेवान्डोस्कीले बायर्नलाई जित दिलाएका हुन। उनले पहिलो हाफको ४३ औं मिनेटमा र दोस्रो हाफको इन्ज्युरी समयमा गोल गरे।

गोलका लागि पहिलो हाफमा थोमस मुलरले पास उलब्ध गराएका थिए भने दोस्रो हाफमा जोसुवा किमिचले पास दिएका थिए।

लेवान्डोस्कीको विजयी गोलसँगै बायर्नले अंकतालिकामा ३० अंक जोडेर शीर्षस्थामा रहँदा दोस्रो र तेस्रो स्थानमा लिभरकुसन र लाइप्जिकको समान २८ अंक छ।

बुन्डेसलिगा अन्तर्गत शनिबार राति सम्पन्न अन्य खेलमा लाइप्जिकले कोल्नसँग गोलरहित बराबरी खेलेको छ भने फ्रान्कफर्टले आउग्सबर्गलाई २–० गोलले हराएको छ।