क्रिस्टलको मैदानमा लिभरपुलको सात गोल

काठमाडौं– इंग्लिस प्रिमियर लिग (ईपीएल) अन्तर्गत शनिबार साँझ सम्पन्न खेलमा लिभरपुलले सानदार जित निकालेको छ।

क्रिस्टल प्यालेसको मैदानमा सम्पन्न खेलमा लिभरपुलले घरेलु टिमलाई ७–० गोलले हराएको हो।

लिभरपुलको उत्कृष्ट जितमा रोबर्टो फर्मिनो र मोहम्मद सलाहले समान २–२ गोल गरे भने साडियो माने र जेम्स हेन्डरसनले १–१ गोल गर्दा मिनमिनोले सुरुवाती गोल गरेका थिए।

खेलको तेस्रो मिनेटमै मानेको पासमा मिनमिनोले गोल गरेपछि फर्ममा देखिएको लिभरपुलले पहिलो हाफको ३५ औं र ४४ औं मिनेटमा दुई गोल थप्यो।

३५ औं मिनेटमा फर्मिनोले मानेलाई गोलका लागि पास मात्र दिएनन्, अग्रता तेब्बर बनाउन रोबर्टसनको पासलाई ४४ औं मिनेटमा आफैंले गोलमा परिणत गरे।

पहिलो हाफमा तीन गोलले अघि रहेको टिमले दोस्रो हाफमा चार गोल थप्यो। ५२ औं मिनेटमा अलेक्जेन्डर अर्नोल्डको पासमा हेन्डरसनले गोल गरे।

त्यसपछि मानेको स्थान लिँदै मैदान पसेका सलाहले ६८ औं मिनेटमा फर्मिनोले गोल गर्दा एसिस्ट गरे। उनले एक एसिस्ट मात्र गरेनन ८१ औं र ८४ औं मिनेटमा दुई गोलसमेत गरे।

सानदार जितसँगै लिभरपुलले शीर्षस्थानमा अंक दूरी बढाएको छ। पछिल्लो खेलमा टोटेनहमलाई हराउँदै शीर्षस्थान कब्जा गरेको लिभरपुलले शीर्षस्थानमा ३१ अंक बनाउँदा एक खेल कम खेलेको टोटेनहमको २५ अंक छ।

यता पराजित क्रिस्टल प्यालेस १२ औं स्थानमा छ।