बेञ्जेमा चम्किँदा रियलको जित

काठमाडौं– स्पेनिस ला लिगा अन्तर्गत मंगलबार राति भएको खेलमा साविक विजेता रियल मड्रिडले एथ्लेटिक क्लबविरुद्ध जित निकालेको छ।

रियलको अल्फ्रेदो डि स्टेफानो रंगशालामा सम्पन्न खेलमा उसले १० खेलाडीमा सिमित पाहुना टिम एथ्लेटिकलाई ३–१ गोलले हराएको हो।

खेलको १३ औं मिनेटमा एथ्लेटिकका राउल गर्सियाले रियलका टोनी कूसलाई दोस्रोपटक फल गरेपछि रेफ्रीले उनलाई मैदान बाहिर पठाएका थिए।

यससँगै दबाबमा आएको एथ्लेटिकोविरुद्ध कूसले पहिलो हाफको अतिरिक्त समयमा गोल गरे। उनलाई भिनिसियस जुनियरले पास उपलब्ध गराए।

पहिलो हाफमा एक गोलले अघि रहेको रियलविरुद्ध एथ्लेटिकका एन्डर कापाले ५२ औं मिनेटमा गोल गर्दै खेललाई बराबरीमा ल्याए।

लामो समय बराबरीमा चलेको खेललाई बेञ्जेमाले दुई गोल गर्दै आफ्नो पक्षमा पारे। 

उनले व्यक्तिगत पहिलो गोल कार्भाजलको पासमा ७४ औं मिनेटमा गरे भने दोस्रो गोल इन्ज्युरी समयमा गरे।

दोस्रो गोलका लागि लुका मोड्रिचले पास उपलब्ध गराएका थिए। यससँगै २६ अंक बनाएको रियल अंकतालिकाको तेस्रो स्थानमा कायम छ।

एथ्लेटिक क्लब भने १३ औं स्थानमा छ।