रियल मड्रिड र ग्लाडबाख च्याम्पियन्स लिगको नकआउट चरणमा

काठमाडौं- पेचिलो प्रतिस्पर्धा रहेको समूह बीबाट रियल मड्रिड र मोन्छेनग्लाडबाख च्याम्पियन्स लिगको अन्तिम १६ मा प्रवेश गरेका छन्।

समूह बी अन्तर्गत रियलको घरेलु मैदानमा सम्पन्न खेलमा घरेलु टिमले ग्लाडबाखविरुद्ध २–० गोलको जित निकाल्दै नकआउट चरणमा प्रवेश गरेको हो।

जितका लागि करिम बेञ्जेमाले दुवै गोल गरेका थिए। उनले खेलको नवौं मिनेटमा पहिलो गोल गरे भने ३१ औं मिनेटमा दोस्रो गोल गर्दै पहिलो हाफमै दुई गोलको अग्रता दिलाए।

तर दोस्रो हाफमा दुवै तर्फबाट गोल हुन नसकेपछि रियलले २–० अग्रतामै खेल जितेको थियो। जितसँगै रियलले १० अंक बनायो भने ग्लाडबाखको ८ अंक मात्र छ।

सोही समूहको अर्को खेलमा शख्तर डोनेटेस्कले इन्टार मिलानसँगै गोलरहित बराबरी खेल्दै दुवै टिम लिगबाट बाहिरिएका छन्।

इन्टर मिलानको मैदानमा सम्पन्न खेलमा दुवै टिमले गोल गर्न सकेनन्। यससँगै समान ८ अंक भएको शख्तर ग्लाडबाखसँग गोलअन्तरले पछि पर्दै तेस्रो स्थानमा सिमित बनेको छ।

यता इन्टर मिलान ६ अंकका साथ पुछारमा छ।