छोटो बाटोबाट चार्टर्ड एकाउन्टेन्ट उत्पादन गर्ने प्रस्ताव खारेज गर: सीए संघ

काठमाडौं- सजिलो र छोटो बाटोबाट चार्टर्ड एकाउन्टेन्ट उत्पादन गर्ने तयारी थालिएको भन्दै नेपाल चार्टर्ड एकाउन्टेन्टस् (सीए) संघले आपत्ति जनाएको छ। 

स्तरोन्नतिको नाममा अवैज्ञानिक ढंगले चार्टर्ड एकाउन्टेन्टहरूको गुणस्तर, अन्तर्राष्ट्रिय मान्यता तथा समग्रमा लेखा व्यवसायीको सामाजिक प्रतिष्ठामा आँच आउने गरी विशेष छुट दिन नहुने संघको भनाइ छ। 

नेपाल चार्टर्ड एकाउन्टेन्ट्स संस्था (आईक्यान) को परिषद्द्वारा गठित ‘रजिस्टर्ड अडिटर्स प्रोफेसनल डेभलपमेन्ट टास्क फोर्स’ले परिषद्मा पेस गरेको प्रतिवेदनमा समेटिएका केही विषयप्रति संघले गम्भीर ध्यानाकर्षण भएको जनाएको हाे। 

संघले प्रतिवेदनका विवादास्पद सिफारिसप्रति असहमति प्रकट गर्दै ती विषयहरू खारेज गर्न पनि माग गरेको छ। 

चार्टर्ड एकाउन्टेन्सी शिक्षाका अन्तर्राष्ट्रिय मापदण्ड, प्रणाली र परम्पराविपरीत हुने गरी प्रतिवेदनमार्फत् प्रस्ताव गरिएका विषयवस्तुमा संघले चार्टर्ड एकाउन्टेन्सी शिक्षाका सरोकारवालासँग छलफल गरिरहेको महासचिव तेजप्रसाद सुवेदीले बताए। 

‘कुनै पनि शिक्षामा सहज र छोटो तर अपूर्ण बाटो अपनाउँदा त्यसमार्फत् दक्ष जनशक्ति उत्पादन गर्न सकिँदैन,’ उनले भने, ‘त्यो जनशक्तिले अपेक्षित परिणाम दिन पनि सक्दैन।’

रजिस्टर्ड अडिटरहरूको क्षमता अभिवृद्धि हुनुपर्छ भन्नेमा संघको आपत्ति नरहेको भन्दै सुवेदीले वैज्ञानिक र समय सान्दर्भिक सुझावविपरीत कदम चालिए संघर्षमा उत्रिने बताएका छन्। 

साथै लेखा व्यवसायमा दूरगामी असर पार्ने नीतिगत निर्णय गर्दा सरोकारवालासँग आवश्यक छलफल र परामर्श गर्न पनि संघले आग्रह गरेको छ।