बंगलादेशले कोरोना भाइरसको तीन करोड डोज निःशुल्क बाँड्ने 

नयाँदिल्ली– बंगलादेश सरकारले कोरोना भाइरसविरुद्धको तीन करोड डोज भ्याक्सिन निःशुल्क वितरण गर्ने भएको छ। 

बंगलादेश सरकारले अक्सफोर्ड युनिभर्सिटीले बनाएको कोरोनाविरुद्धको तीन करोड डोज निःशुल्क वितरण गर्ने घोषणा गरेको हो।

अक्सफोर्डले बनाएको खोपले जनवरीसम्म प्रयोगको अनुमति पाउने अपेक्षा गरिएको छ।

बंगलादेशका मन्त्रिपरिषद्का सचिव खान्डकर अनवरुल इस्लामले प्रधानमन्त्री सेख हसिनाको अध्यक्षतामा बसेको मन्त्रिपरिषद्को बैठकले भ्याक्सिन विश्व स्वास्थ्य संगठनको प्रोटोकल अनुसार वितरण गर्ने निर्णय भएको बताएको भारतीय सञ्चारमाध्यमले जनाएका छन्।

भ्याक्सिन खरिदका लागि बंगलादेशले सात सय करोड खर्च गर्ने घोषणा गरेको छ। अनवरुल इस्लामले भनेका छन्, ‘हामी जनतालाई भाइरसबाट मुक्ति दिलाउन चाहन्छौं।’ 

चार नोभेम्बरमै बंगलादेशले भारतको सिरम इन्स्टिच्युटबाट तीन करोड डोज अक्सफोर्डको भ्याक्सिन किन्न सम्झौता गरिसकेको छ। यो भ्याक्सिन एक व्यक्तिलाई दुई सट्स दिइनेछ। भ्याक्सिन आयात गर्ने प्रक्रिया जनवरीबाट सुरु हुने अपेक्षा छ। बंगलादेशलाई गावी भ्याक्सिन एलाइन्सले समेत कोरोना भाइरसको ६ करोड ८० लाख डोज भ्याक्सिन दिनेछ।

बंगलादेशको जनसंख्या १६ करोड १४ लाख रहेको छ। पहिलो चरणमा अत्यावश्यक सेवामा काम गर्ने कर्मचारी, स्वास्थ्यकर्मी र वृद्धवृद्धालाई भ्याक्सिन वितरण गर्ने जनाइएको छ।