पाकिस्तानले भन्‍यो - भारत आतंकवादको प्रायोजक हो, जम्मु-काश्‍मीर भारतको आन्तरिक मामिला होइन

नयाँ दिल्ली- पाकिस्तानले भारत आतंकवादको प्रायोजक भएको आरोप लगाएको छ। 

संयुक्त राष्ट्रसंघमा शनिबार भारतीय प्रधानमन्त्री नरेन्द्र मोदीले आफ्नो सम्बोधनका क्रममा उठाएका विषयहरुको प्रतिक्रिया दिन पाकिस्तानले राइट टु रिप्लाईको प्रयोग गर्दै सोमबार भारतमाथि नै आरोप लगाइएको हो। 

पाकिस्तानका तर्फबाट भारतले उठाएका विषयहरुमा प्रतिक्रिया दिँदै संयुक्त राष्ट्रसंघका लागि पाकिस्तानी प्रतिनिधि साइमा सलिमले भारत आतंकवादको प्रायोजक भएको र आतंकवादलाई वित्त पोषण गरिरहेको बताएकी हुन्। 

यसअघि भारतले पाकिस्तानमाथि आतंकवादलाई हतियारको रुपमा प्रयोग गरेको आरोप लगाएको थियो। उक्त आरोपको जवाफमा साइमाले भनिन्, 'भातरले आतंकवादको बनावटी कुराहरुको प्रयोग गर्दै पुराना तरिकाहरुलाई दोहोर्‍याएर विगतमा कुनै विस्तारवादी मुलुकले गरिरहेको व्यवहारतर्फ अग्रसर देखिन्छ।'

भारतले नै यस क्षेत्रमा आतंकवादलाई वित्त पोषण गरिरहेको आरोप लगाएकी हुन्। उनले जम्मु काश्‍मीर पूर्णरुपमा कहिल्यै पनि भारतको भूभाग नभएकोसमेत बताएकी छन्। उनले भनिन्, 'जम्मु काश्‍मीर कहिल्यै पनि पूर्णरुपमा भारतको भूभाग थिएन। न त जम्मु काश्‍मीर भारतको आन्तरिक मामिलाको मात्र विषय नै हो।' 

जम्मु काश्‍मीर सुरुवात देखि नै अन्तर्राष्ट्रिय विवादको विषय भएको सुरक्षा परिषद्‌का कयौं प्रस्तावहरुमा यसको अन्तिम फैसला राष्ट्रसंघको निगरानीमा गरिनुपर्ने उल्लेख गरिएकोसमेत उनले बताएकी छन्। 

यसअघि भारतले जम्मु काश्मीर भारतको आन्तरिक मामिला भएको र यसलाई पाकिस्तानले अन्तर्राष्ट्रिय मञ्‍चमा उठाएर भारतको बद्‌नाम गर्न खोजेको बताएको थियो।