कांग्रेस महाधिवेशन: पोखरा महानगरपालिकामा ९८ प्रतिशत मतदान

पोखरा- नेपाली कांग्रेसको १४ औं महाधिवेशन अन्तर्गत शनिबार भएको पोखरा महानगरपालिकाको मतदानमा एक हजार ३४४ मत खसेको छ। पोखरा महानगरपालिकाको पदाधिकारीका लागि मतदान गर्न १ हजार ३७० क्षेत्रीय प्रतिनिधि चुनिएका थिए। यो कुल मतदाताको ९८ प्रतिशत हो। 

पोखरा महानगरपालिका क्षेत्रफलका हिसाबले देशकै सबैभन्दा ठूलो पालिका हो। 

निर्वाचन समितिका संयोजक आरसी बिमलका अनुसार अबको केही समयमा मतगणना सुरु हुनेछ। बिहान साढे ९ बजे सुरु भएको मतदान साढे ४ बजे सकिएको हो। महानगर समितिको सभापतिका लागि ६ जना उम्मेदवार छन्।

पोखरा ११ का वडाध्यक्ष मोहनप्रसाद बास्तोला, पत्रकार गंगाधर पराजुली, पोखरा ९ का वडाध्यक्ष रामराज लामिछाने, नेता मिलन तिवारी, पोखरा उद्योग वाणिज्य संघका महासचिव सुरेन्द्रमान विजुक्छे र पत्रकार ज्योति हमाल सभापतिका उम्मेदवार छन्। कांग्रेस पोखरा महानगर समितिको दुई उपसभापतिमा ६ जनाको उम्मेद्वारी परेको थियो। उपसभापतिको उम्मेदवार प्रयागराज भण्डारी, कृष्णप्रसाद अधिकारी, निर्दोषविक्रम पौडेल, भवसागर बराल, शिव केसी र राजेन्द्र बराल छन्।

यसैगरी दुई सचिवमा गणेशबहादुर थापा, टुवराज बास्तोला र सुरेन्द्रबाबु तिवारी उम्मेदवार छन्। 

कास्कीको अन्‍नपूर्ण र रुपा गाउँपालिकामा यसअघि नै सर्वसम्मत नेतृत्व चयन भइसकेको छ। मादी र माछापुछ्रे गाउँपालिकामा पनि मतदान सकिएको बिमलले जानकारी दिए।