चौथो जितसँगै दिल्ली आईपीएलको शीर्ष स्थानमा 

काठमाडौं- जारी इन्डियन प्रिमियर लिग(आईपीएल) अन्तर्गत सोमबार राति सम्पन्न खेलमा दिल्ली क्यापिटल विजयी भएको छ। दिल्लीले रोयल च्यालेन्जर्स बैंगलोरलाई ५९ रनले हराएको हो।

टस हारेर ब्याटिङको निम्तो पाएको दिल्लीले सम्पूर्ण ओभर खेल्दै चार विकेटको क्षतिमा १९६ रन बनायो। १९७ रनको लक्ष्य पछ्याएको बैंगलोर निर्धारित ओभरमा ९ विकेट गुमाएर १३७ रनमा समेटिएपछि खेल दिल्लीले जितेको हो।

जितका लागि मार्कस स्टोनिसले ५३ रनको अर्धसतकिय इनिङ खेले। यस्तै ओपनर पृथ्वी श र शिखर धवनले क्रमशः ४२ र ३२ रनको योगदान दिए।

ऋषभ पन्त ३७ रन बनाएर आउट भए। यता बैंगलोरका मोहम्मद सिरजले दुई विकेट लिए भने इसरु उडाना र मोइन अलीले समान १-१ विकेट लिए।

जवाफी ब्याटिङमा आएको बैंगलोरका कप्तान विराट कोहलीले ४३ रन बनाए भने वासिंटन सुन्दरले १७ रन बनाए यसबाहेक अन्य खेलाडी सम्झनलायक प्रदर्शन गरेनन्।

दिल्लीका लागि कागिसो रबाडाले चार विकेट गिराए भने एनरिक नोर्टजे र अक्षर पटेलले समान २–२ विकेट लिए। सबैभन्दा कम अर्थात् ४.५ को इकोनोमी प्रदान गरेका पटेल प्लेयर अफ दी म्याच घोषित भए।

जितका साथ पाँच खेलबाट चार खेल जित्दै ८ अंक बनाएको दिल्ली अंकतालिकाको शीर्षस्थानमा छ भने बैंगलोर ६ अंकका साथ तेस्रो स्थानमा छ।