कर्णालीमा कोरोना जोखिम बढ्यो, हप्ता दिनमै थपिए ४४० संक्रमित

सुर्खेत- कर्णाली प्रदेशमा पुनः कोरोना संक्रमण पढेको छ। पछिल्लो एक हप्तामा मात्रै साढे चार सय संक्रमित थपिएका हुन्। 

साउन १० गतेदेखि १६ गतेसम्म कूल ४४० जना संक्रमति थपिएका छन्। तथ्याङ्क अनुसार साउन १० गते २१ जना, ११ गते ६८ जना, १२ गते ४२ जना, १३ गते ६१ जना, १४ गते ९४ जना, १५ गते ७० जना र १६ गते ८४ जना संक्रमित भएका हुन्।

दश जिल्ला मध्ये सुर्खेतमा सबैभन्दा धेरै संक्रमण फैलिएको कर्णाली प्रदेश स्वास्थ्य सेवा निर्देशनालयले जनाएको छ। कूल संक्रमितमध्ये सुर्खेतको वीरेन्द्रनगरमा मात्रै २०२ जना सक्रिय संक्रमित रहेको निर्देशनालयका सूचना अधिकारी नोदनारायण चौधरीले जनाए।

संक्रमण बढेपछि आज (आइतबार)देखि निषेध आदेशमा कडाई गरिएको छ। आजदेखि वीरेन्द्रनगर बजारक्षेत्र समयावधि निर्धारण खुल्ला गरिएको छ। जसअनुसार खाद्यान्न पसल बिहान ९ बजेदेखि साँझ ६ बजेसम्म मात्रै खोल्न पाइने भएको छ। तर, तरकारी फलफूल, दुग्धजन्य पदार्थ पसल पनि बिहान ६ बजेदेखि साँझ ६ बजेसम्म खोल्न पाइने छ।

त्यस्तै सार्वजनिक सेवा प्रवाह गर्ने र विकास निर्माणसँग सम्बन्धित कार्यालयहरूले स्वास्थ्य मापदण्डको पूर्ण पालना गरी सञ्चालन गर्ने, होटल तथा रेस्टुरेन्टमा कूल क्षमताको ५० प्रतिशत नबढ्ने गरी सञ्चालन गर्ने गरी खुकुलो मापदण्ड बनाएको सुर्खेतका प्रमुख जिल्ला अधिकारी छविलाल रिजालले जनाए। 

स्वास्थ्य, सुरक्षा, सञ्चार, विद्युत्, इन्धन, खानेपानी, सार्वजनिक तथा वित्तीय निर्माण कम्पनीसम्बन्धी कार्यहरू, बैंक तथा वित्तीय संस्थाहरूलाई निर्वाध सञ्चालन गर्न दिएको छ।