विराटनगर जुट मिल्सका सुरक्षा गार्डले चार वर्षदेखि तलब पाएनन्

विराटनगर- विराटनगर जुट मिल्सका सुरक्षा गार्डले चार बर्षदेखि तलब पाएका छैनन ।

सुरक्षा गार्डले लामो समयसम्म तलव नपाएपछि असोज १ गतेबाट मिल्समा सुरक्षा गार्ड खटाएर सुरक्षा प्रदान गर्न नसकिने सेक्युरेटी प्रालिले जनाएको छ ।

जुल मिल्समा सुरक्षा गार्ड खटाउँदै आएको अर्जुनदृष्टि सेक्युरिटी प्रालिले ६ जना गार्डले चार वर्षदेखि तलव पाउन नसकेको बताएको छ । सुरक्षा गार्डले चार वर्षदेखिको १९ लाख ५६ हजार रुपैयाँ तलव पाउन बाँकी रहेको सेक्युरिटी कम्पनीका प्रमुख व्यवस्थापक तीर्थराज घिमिरेले बताए ।

२०७१ सालदेखि मिल्समा सेक्युुरिटी कम्पनीले सुरक्षा गार्ड खटाएर सुरक्षा प्रदान गर्दै आएको छ । आगामी असोज १ गतेसम्म मिल्स व्यवस्थापनले सबै तलव भुक्तानी नगरेमा ६ जनानै सुरक्षा गार्ड फिर्ता गरिने घिमिरेको भनाइ छ ।

जुट मिल्सका अध्यक्ष बसन्त वनले २४ घण्टानै सुरक्षाका लागि खट्ने सुरक्षा गार्डले तलव नपाएको सत्य भएको बताए । जुट मिल्स लामो समयदेखि बन्द भएका कारण आम्दानी हुन नसक्दा र स्रोत व्यवस्थापनमा समस्या हुँदा तलव दिन नसकिएको वनले बताए ।

जुट मिल्स चाँडो सञ्चालनमा ल्याएर तलव तथा सेवा सुविधा वापतको बाँकी बक्यौता तिर्दै जाने योजना रहेको उनको भनाई छ । मिल्स सञ्चालन हुन नसक्दा नेपालकै जेठो विराटनगर जुटमिल्सबाट रुग्ण बन्दै गएको छ ।

उद्योगमा सेक्युरिटी कम्पनीले खटाइएका ६ जना र आन्तरिक रुपमा राखिएका ५ जना गरेर ११ जना सुरक्षा गार्ड छन् । १० जना प्रशासनिक कर्मचारी छन् ।

वनले स्रोत व्यवस्थापनको चाँजोपाँजो मिलाउन नसक्दा लामै समयदेखि सुरक्षा गार्डसहित प्रशासनिक कर्मचारीले पनि तलव पाउन नसकेको बताए । सुरक्षा गार्ड मिल्सलाई आवश्यक पर्ने भएकाले जतिसक्दो तलव भुक्तानीका लागि पहल भइरहेको उनको भनाइ छ ।

वि.स. १९९३ सालमा जुुट मिल्स स्थापना भएर सञ्चालनमा ल्याइएको थियो । यहि मिल्स सञ्चालनमा आएपछि मुलुकमा आद्यौगिक क्षेत्र विस्तार र अन्य उद्योग तथा कलकारखाना स्थापनाको जग बसेको हो ।

२०७५ चैत देखि मिल्स बन्द छ । ६७ बिघा क्षेत्रफलमा फैलिएको मिल्सबाट जुटको बोरा र सुतली उत्पादन हुँदै आएको थियो । सरकार र मन्त्री परिवर्तन लगत्तै पदाधिकारी र व्यवस्थापन पक्ष पनि फेरिँदा लामो समयदेखि बन्द रहेको मिल्स पूर्ण क्षमतामा सञ्चालनमा आउन सकेको छैन ।