हङकङसँग बराबरीमा रोकिँदै एसियन कप छनोटबाटै बाहिरियो नेपाल

काठमाडौं– एएफसी वुमन्स एसिया कप छनोटको क्वालिफायर राउन्डअन्तर्गत आजको खेलमा नेपाल हङकङसँग गोलरहित बराबरीमा रोकिएको छ। यो बराबरीसँगै अर्को वर्ष भारतमा हुने एएफसी एसियन महिला कप खेल्नबाट नेपाल बञ्चित भएको छ। नेपाली टिम छनोट चरणबाटै बाहिरिएको छ।

छनोटको पहिलो खेलमा नेपालले फिलिपिन्ससँग २–१ गोलको हार बेहोरेको थियो भने आजको खेलमा बराबरी गरेको छ। फिलिपिन्ससँगको खेलमा नेपालको तर्फबाट विमला चौधरीले १० औं मिनेटमा गोल गरेकी थिइन्।

छनोट खेलमा नेपालको तर्फबाट त्यो एकमात्र गोल रह्यो। एसियन कप खेल्नका लागि नेपाल समूह विजेता हुनुपर्ने थियो। तर, नेपालले दुवै खेलमा जित निकाल्न नसकेपछि समूह विजेता बन्न सकेन्।

आजको खेलसँगै नेपाल र हङकङको समान १–१ अंक छ भने फिलिपिन्सको ३ अंक छ। ऊ अहिले समूह एफको शीर्षस्थानमा छ। अब सेप्टेम्बर २४ को खेलमा हङकङले फिलिपिन्सको सामना गर्नेछ। त्यो खेलको विजेता टिमले अर्को वर्ष भारतमा हुने एसियन कप खेल्नेछ।

यदि त्यो खेल बराबरी भएको अवस्थामा चार अंक बनाउँदै फिलिपिन्स समूह विजेता बन्नेछ। यससँगै दुई दशकपछि एसियन कपको छनोटमा पुगेको नेपालले एसियन कप खेल्ने निकै महत्वपूर्ण अवसर गुमाएको छ।