स्पेनिस फरवार्ड रोड्रिगो लिड्स युनाइटेडमा जाने

लन्डन– च्याम्पियनसिपको लिगविजेता बन्दै १६ वर्षपछि प्रिमियर लिगमा फर्किएको लिड्स युनाइटेडले स्पेनिस फरवार्ड रोड्रिगो मोरिनोलाई अनुबन्ध गर्ने भएको छ। उसले ३० मिलियन यूरोमा रोड्रिगोलाई अनुबन्ध गर्ने भएको हो।

स्पेनिस क्लब भ्यालेन्सियाले पनि रोड्रिगोलाई इंग्ल्यान्डका लागि विदा गरेको छ। ‘भ्यालेन्सिया रोड्रिगोको ट्रान्सफरलाई लिएर लिड्सँगको सम्झौता नजिक पुगेको छ, मेडिकल पास र डकुमेन्टेसनका काम सकिएका छन्,’ ला लिगा साइडले ट्विटरमा लेखेको छ, ‘६ सिजनका लागि रोड्रिगोलाई धन्यवाद। उनले क्लबका लागि धेरै योगदान दिएका छन्।’

उनीहरुको सम्झौतामा रोड्रिगोको अनुबन्ध कति समयसम्म रहने र भ्यालेन्सियालाई कति रकम बुझाउने नभए पनि इंग्लिस मिडियाले ३० मिलियन यूरोमा सम्झौता गरेको बताएका छन्।

२९ वर्षे रोड्रिगोले भ्यालेन्सियामा २२० खेल खेल्दै ५९ गोल गरेका छन्। साथै उनले फ्लेमिङगो र रियल मड्रिडको युवा एकेडेमीबाट पनि खेलिसकेका छन्

उनले यसअघि इंग्लिस फुटबलमा १७ खेल खेलिसकेका छन्।

- इएसपीएनडटइन