हङकङविरुद्ध यस्तो छ नेपालको प्लेइङ सेट

काठमाडौं– एएफसी एसियन महिला कप छनोटको क्‍वालिफाएरको दोस्रो खेलका लागि नेपाली टिमले हङकङविरुद्ध खेल्दैछ। हङकङविरुद्ध नेपालको खेलका लागि प्लेइङ सेट सार्वजनिक भएको छ। प्रशिक्षक ग्यारी पिलिप्सले पछिल्लो खेलको टिमलाई उतारेका छन्।

मंगलबारको टिममा पनि अग्रपंतिमा खेल्ने जिम्मा विमला चौधरी, प्रिति राई र सविता राना मगरले पाएका छन्। त्यस्तै अट्याकिङ मिडफिल्डमा सरु लिम्बू रहेकि छन्। नेपाली समयअनुसार दिउँसो पौने ४ बजे सुरु हुने खेलमा नेपालले हङकङको सामना गर्न लागेको हो। उज्वेकिस्तानको जेएआर रंगशालमा हुने खेलमा नेपालले हङकङविरुद्ध जितको लक्ष्यका साथ मैदान उत्रने छ।

तर, यसअघिका नेपाल र हङकङको भेट नेपाली टिमका लागि सम्झनलायक भने छैन। नेपालले यसअघि हङकङविरुद्ध दुई खेल खेल्दा दुबैमा हार बेहोरेको थियो।

सन् १९८६ मा भएको पहिलो भेटमा हङकङसँग १–० गोलको हार बेहोरेको थियो भने सन् १९८९ मा भएको दोस्रो भेटमा नेपाल ३–० ले पराजित भएको थियो। तसर्थ, मंगलबार नेपाली टिमलाई ती दुई खेलको बदला लिने अवसरका रुपमा लिएको छ।