१३ औं सागमा ब्याडमिन्टन खरिदमा भएको अनियमितताबारे छानबिन सुरु

काठमाडौं– १३ औं सागमा ब्याडमिन्टन खरिदमा भएको अनियमितताबारे छानबिन गर्न गठित उपसमितिले काम थालेको छ। ‘१३ औँ साग ब्याडमिन्टन खेल सामग्री खरिद वितरणमा अनियमितता तथा अनियमित रुख कटानसम्बन्धी छानबिन उपसमिति’ले आज(शनिबार) जुम मिटिङ गर्दै छानबिन प्रारम्भ गरेको हो।

राष्ट्रिय खेलकुद परिषद (राखेप)ले गत साउन ३२ गते अनियमितताबारे छानबिन गर्न परिषद् सदस्य गोविन्दप्रसाद भट्टराईको संयोजकत्वमा गठित ५ सदस्यीय उपसमिति गठन गरेको थियो। उपसमितिमा महेन्द्रकुमार राई, अर्जुन बिक, नारायण अर्याल र पाशाङ शेर्पा सदस्य छन्।

ब्याडमिन्टनका खेलाडीले १३ औं सागमा जुत्ता नपाएको, खेल पोशाक, म्याट र खेल सामग्री गुणस्तर नभएको भनि राखेपका सदस्यसचिव रमेशकुमार सिलवाललाई उजुरी गरेका थिए। सोही सन्दर्भमा परिषद् सदस्य सुभाष भुषालले सार्वजनिक अभिव्यक्ति दिएपछि युवा तथा खेलकुद मन्त्रालयले साउन २९ गते राखेपलाई छानबिनका लागि पत्र पठाएको थियो।

सोही पत्रका आधारमा सदस्य सचिव सिलवालले छानबिन उपसमिति गठन गरेका थिए। उपसमितिले ब्याडमिन्टनको अनियमितताका साथै सातदोबाटोस्थित रुख काटिएको र बिक्री गरिएको भन्ने आरोपबारे पनि अध्ययन गर्ने जिम्मेवारी पाएको छ।

परिषदबाट प्राप्त कार्यादेशबमोजिम आज बसेको उपसमितिको बैठकबाट छानबिनलाई विभिन्न चरणहरुमा बाँडेर अगाडि बढ्ने र सदस्यहरुलाई जिम्मेवारी बाँडफाँड गर्ने निर्णय गरिएको समिति अध्यक्ष भट्टराईले बताएका छन्।

साथै, समितिले सरोकारवालाले उल्लेखित छानबिनसम्बन्धी गुनासो, सुझाव, निवेदनलगायत प्रमाण कागजात पेश गर्न सात दिन (भदौ १२ गतेसम्म) को समय दिने निर्णय गरेको छ।