प्राविधिक कारणले रिपोर्ट होल्ड भएको भनिएका खेलाडीमा कोरोना पोजेटिभ

काठमाडौं– मंगलबार कोरोना टेस्ट गराएका राष्ट्रिय फुटबल टिमका एक जना खेलाडीमा कोरोना रिपोर्ट पोजेटिभ देखिएको छ।

मंगलबार २३ खेलाडीसहित प्रशिक्षक र अफिसियल गरी २९ जनाको कोराना टेस्टमा २८ जनाको रिपोर्ट नेगेटिभ आएको थियो।

त्यसपछि नेपाल समयसँग कुरा गर्दै राष्ट्रिय टिमका व्यवस्थापक मधुसुदन उपाध्यायले प्राविधिक कारणले रिपोर्ट होल्ड भएको तर रिपोर्ट के आएको थाहा नभएको बताएका थिए।

तर त्यसलगत्तै गरिएको उनको दोस्रो टेस्टमा भने आज बिहीबार कोरोना पुष्टि भएको हो। मेडिकल गोपनियताका कारण खेलाडीको नाम भने खुलाइएको छैन। अब तेस्रो चरणको कोरोनाको परीक्षणको लागि एक प्राइभेट अस्पतालमा कोरोना परीक्षण गराइने स्रोतले बताएको छ।

यता, सोमबार टेस्ट गरेर बुधबार रिपोर्ट आएका सबै ११ खेलाडीको कोरोना रिपार्ट नेगेटिभ आएको थियो भने मंगलबार टेस्ट गरिएका २३ खेलाडीमध्येका एक जनामा रिपोर्ट पोजेटिभ आएका हो।

सोमबार टेस्ट गरेर नेगेटिभ आएका खेलाडी घर (काठमाडौं बाहिर) फर्किसकेका छन् भने मंगलबार गरिएको टेस्टमा काठमाडौं उपत्यकामै बसोबास गरिरहेका खेलडी थिए।

एसियाली फुटबल कन्फेडेरेसन(एएफसी)ले गत बुधबार विश्वकप २०२२ र एसिया कप २०२३ को छनोट खेल स्थगित गरेपछि खेलाडीहरु घर फर्किका हुन्।