रेम्डिसिभिर औषधिको क्लिनिकल परीक्षणका लागि स्वास्थ्य सेवा विभागको आह्वान

काठमाडौं– कोरोना भाइरसका संक्रमितको उपचारका लागि रेम्डिसिभिर औषधिको क्लिनिकल परीक्षणका लागि सहभागी हुन स्वास्थ्य सेवा विभागले अस्पतालहरुलाई आह्वान गरेको छ ।

विभागले सूचना जारी गरी औषधि प्रयोग गर्न इच्छुक अस्पताललाई निवेदन दिन अपिल गरेको छ।

कोरोनाका बिरामी बढ्दै गएपछि नेपाल स्वास्थ्य अनुसन्धान परिषद्, कोभिड उपचार निर्देशिका र स्वास्थ्य प्रविधि मूल्यांकन समितिको सिफारिसमा मन्त्रालयले यो औषधिको प्रयोग गर्न प्रक्रियाका लागि अनुमति दिएको हो।

स्वास्थ्य तथा जनसंख्या मन्त्रालयले साउन २६ गते रेम्डिसिभिर औषधि प्रयोगको लागि अध्ययन गर्ने निर्णय गरेको थियो । रेम्डिसिभिर सम्बन्धित चिकित्सकको सिफारिस तथा प्रत्यक्ष निगरानी र बिरामीको अनुमतिमा प्रयोग गर्न मिल्ने मन्त्रालयले जनाएको छ।

भारतलगायत देशमा यो औषधि गम्भीर किसिमका संक्रमितलाई प्रयोग भइरहेको छ र यसको नतिजा प्रभावकारी देखिएपछि नेपालमा पनि रेम्डिसिभीरको प्रयोग गर्न थालिएको छ ।

अमेरिकाको जिलिड फर्मासिटिकल्सले उत्पादन गरेको रेम्डिसिभिरलाई अमेरिकाको फुड एन्ड ड्रग एडमिनिस्ट्रेसन (एफडिए)ले कोभिड–१९ का संक्रमितमा प्रभावकारिता अध्ययन गर्न स्वीकृति दिएको थियो ।