सीमामा अलपत्र परेकालाई बोकेको बस डोटीमा दुर्घटना, तीनको मृत्यु, २९ घाइते

धनगढी- सुदूरपश्चिम प्रदेशको डोटीमा भएको बस दुर्घटना हुँदा ३ जनाको मृत्यु भएको छ भने २९ जना घाइते भएका छन् ।

प्रदेश ट्राफिक प्रहरी कार्यालय अत्तरियाका प्रमुख ट्राफिक प्रहरी उपरीक्षक लोकेन्द्रबहादुर श्रेष्ठका अनुसार दुर्घटनामा तीन जनाको घटना स्थलमै मृत्यु भएका र २९ जना घाइते भएको बताए ।

दुर्घटनामा परेर मृत्यु भएकाहरुको सनाखत भने हुन नसकेको ट्राफिक प्रहरी उपरीक्षक लोकेन्द्रबहादुर श्रेष्ठले बताए ।

घटनास्थलबाट घाइतेहरुको उद्धार गरेर उपचारका लागि अस्पताल लैजाने काम भैरहेको बताउँदै प्रहरी उपरीक्षक श्रेष्ठले सात जनाको अवस्था भने गम्भीर रहेको बताए ।

धनगढीको त्रिनगर सीमानाका अलपत्र परेका ३२ जना यात्रु बसमा सवार रहेको भएपनि यात्रुको एकिन संख्या भने हालसम्म थाहा हुन नसकेको प्रहरी उपरीक्षक श्रेष्ठले बताए ।

भारतबाट फर्किएकाहरुलाई धनगढीबाट अछाम जादै गरेको ना ६ ख २५२९ नम्बरको बस डोटीको पूर्वीचौकी गाउँपालिका–१, फुलोटमा आज बिहान दुर्घटना भएको हो ।

बस सडकबाट झण्डै ५० मिटर तल खसेको छ भने दुर्घटनाको कारण भने खुल्न नसकेको श्रेष्ठले बताए ।