गोंगबु हत्या प्रकरण : तस्बिर सार्वजनिक गरेको केही घण्टामा शव पहिचान

काठमाडौं- काठमाडौंको गोंगबुमा आइतबार बिहान हत्या गरेर फालिएका व्यक्तिको पहिचान खुलेको छ।

शरीर सुटकेसमा, टाउको र खट्टा झोलामा राखेको अवस्थामा शव भेटिएको थियो।

शवको पहिचान हुन नसकेपछि प्रहरीले सोमबार शवको तस्बिर सार्वजनिक गरेको थियो। तस्बिर सार्वजनिक गरेको केही घण्टामा शवको सनाखत भएको प्रहरीले जनाएको छ।

हत्या गरिएका व्यक्ति रोल्पाका कृष्णबहादुर बोहरा रहेको महानगरीय प्रहरी कार्यालयका प्रमुख डीआईजी विश्वराज पोखरेलले जानकारी दिए। बोहरालाई चिन्ने व्यक्तिले प्रहरी कार्यालयमा आएर पहिचान खुलाएको बताइएकाे छ।

‘हत्या गरिएका व्यक्तिको पहिचान खुलेको छ,’ उनले भने, ‘बाँकी घटनाबारे बुझ्ने काम भइरहेको छ।’ उनले अनुसन्धान जारी रहेको थप विवरण आउन समय लाग्ने बताए।

शवको सनाखत हुन नसकेपछि आजै महानगरीय अपराध महाशाखाले व्यक्तिको तस्बिर सार्वजनिक गरेको थियो। अपराध महाशाखा, महानगरीय प्रहरी परिसर सहितका प्राविधिक टोलीहरु अनुसन्धानमा खटिएका छन्।