कोरोना संक्रमणबाट मोरङमा एकै दिन २ जनाको मृत्यु

विराटनगर– कोरोना संक्रमणबाट मोरङमा बुधबार २ जनाको मृत्यु भएको छ। संक्रमणबाट मृत्यु हुनेमा विराटनगर–९ र रंगेली–८ का पुरुष छन्।

कोसी अस्पताल विराटनगरमा मंगलबार राति भर्ना भएका विराटनगर–९ का ४५ वर्षीय पुरुषको बुधबार दिउँसो मृत्यु भएको हो।
ज्वरोका साथै जन्डिसको समस्या देखिएपछि उनलाई कोरोनाको आशंकामा आइसोलेसनमा भर्ना गरिएको थियो।

रंगेलीका पुरुषको अस्पताल आइनपुग्दै बाटैमा मृत्यु भएको मेडिकल सुपरिटेन्डेन्ट डा. चुमनलाल दासले बताए।

मृत्युपछि दुवै जनाको स्वाब परीक्षण गर्दा कोरोना पोजेटिभ रिपोर्ट आएको मेसु डा. दासले बताए। रंगेली ८ भएका ४५ वर्षीय पुरुषलाई श्वासप्रश्वासको समस्या भएपछि कोसी अस्पताल ल्याइएको थियो।

मोरङमा कोरोना संक्रमणबाट मृत्यु हुनेको संख्या ४ पुगेको छ। यसअघि विराटनगर र सुनबर्षीका १–१ पुरुषको मृत्यु भएको थियो।