सिटीको प्रतिबन्ध फुकुवा, अर्को सिजनको च्याम्पियन्स लिग खेल्न पाउने

एजेन्सी– इंग्लिस क्लबमा म्यानचेस्टर सिटीको प्रतिबन्ध फुकुवा भएको छ। प्रतिबन्ध फुकुवासँगै अब उसले आगामी सिजनको च्याम्पियन्स लिग खेल्न पाउने भएको छ।

सन् २०१२ देखि २०१६ सम्म फाइनान्सियल फेयर प्लेको नियम तोडेको आरोपमा युरोपको सर्वोच्च फुटबल निकाय युईएफएले गत फेब्रुअरीमा सिटीलाई प्रतिबन्ध लगाएको थियो।

सो प्रतिबन्धविरुद्ध सिटीले अर्विटेसन फर स्पोर्ट अदालत (कास)मा अपिल गरेको थियो। सो अपिलको सदर गर्दै अदालतले आज उसको प्रतिबन्ध फुकुवा गरिदिएको छ।

अदालतले सिटीको जरिवाना पनि घटाएको छ। उसले ३० मिलियन यूरो तिर्नुपर्नेमा अब १० मिलियन यूरो तिरे हुने भएको छ। साथै उसको इक्विटी फन्ड र स्पोन्सरसिप योगदानको विवाद पनि समाधान भएको छ।

फुकुवापछि सिटीले न्याय पाएको भन्दै अदालतलाई धन्यवाद दिएको छ।

सन् २०१८ मा जर्मनीको एक पत्रिकाले सिटीका केही दस्तावेजहरु सहित युरोपियन फुटबललाई झुक्याउने तरिकाले स्पोन्सरसिप बढाएको भन्ने समाचार सार्वजनिक गरेको थियो। सोही विषयको अध्ययन गर्दै युइएफएको इन्डिपेन्डेन्ट एड्जुडिक्टरी च्याम्बरले सिटीले उक्त ५ वर्षसम्म युईएफएलाई गलत सूचना दिएको भन्ने निर्णय गरेको थियो।

च्याम्बरको निर्णयलाई सदर गर्दै गत फेब्रुअरीमा युईएफएले सिटीलाई प्रतिबन्ध गरेको थियो। अब युईएफएले कासको निर्णय विपरीत स्विस फेडरल अदालतमा फेरि पनि अपिल गर्न सक्नेछ।

जारी सिजनको च्याम्पियन्स लिगमा अब सिटीले अन्तिम १६ को खेल स्पोनिस क्लब रियल मड्रिडको सामना गर्नेछ। यदि रियललाई हराएको खण्डमा उसले युभेन्टस र लायोनको विजेतासँग प्रतिस्पर्धा गर्नेछ।