प्रदेश १ मा संकलित सबै नमुनाको परीक्षण, बढी संक्रमित ४० वर्षमुनिका

विराटनगर– प्रदेश १ मा बिहीबारसम्म २९ हजार १ सय ९ जनाको परीक्षण गरिएको छ । परीक्षण गरिएका मध्ये ७ सय ४ मा पोजेटिभ रिपोर्ट आएको छ ।

२८ हजार ४ सय ५ मा नेगेटिभ रिपोर्ट आएको छ । प्रदेश १ मा संकलन गरिएका सबैको परीक्षण भएको छ । क्युमा स्वाव नभएको सामाजिक विकास मन्त्रालयले जनाएको छ । मन्त्रालयका अनुसार शुक्रबार ३ सय ७७ स्वाव संकलन गरिएको थियो ।

तीनवटा प्रयोगशाला मध्ये कोशी अस्पताल विराटनगरबाट ३ सय ५५, प्रदेश जनस्वास्थ्य प्रयोगशालाबाट २ सय १०, वीपी कोइराला स्वास्थ्य विज्ञान प्रतिष्ठान धरानबाट १ सय २७ जनामा कोरोना रिपोर्ट पोजेटिभ आएको छ ।

प्रदेश १ मा प्रयोगशाला शुरु हुनु अघि काठमाण्डौंमा गरिएको परिक्षणमा १२ जनाको रिपोर्ट पोजेटिभ आएको थियो । प्रदेश १ मा संकलिन नमुना धेरै दिन क्युमा रहेको गुनासो आएपछि परीक्षणलाई तीव्रता दिन दवाव बढेको थियो ।

४० वर्ष सम्मका संक्रमित बढी

प्रदेश १ मा बिहीबारसम्म ७ सय ४ जना कोरोना संक्रमित भएका छन् । जसमा १ सय १५ महिला र ५ सय ८९ पुरुष छन् । प्रदेश १ मा कोरोना संक्रमित मध्ये ११ वर्षदेखि ४० वर्ष उमेर समूहका व्यक्तिहरु बढी संक्रमित भएका छन् ।

सामाजिक विकास मन्त्रालयका अनुसार २१ वर्षदेखि ३० वर्ष उमेर समूहका अधिक संक्रमित छन् । प्रदेश १ मा पछिल्लो समय देखिएको संक्रमणमा भारतबाट आउनेहरु बढी छन् । भारतमा कामको शिलशिलामा गएर फर्कनेहरु बढी संक्रमित भएका छन् । सामाजिक विकास मन्त्रालयको तथ्याङ्क अनुसार २१ देखि ३० वर्षको उमेर समूहका शुक्रबार सम्म २ सय ७६ जना संक्रमित छन् । जसमा ४८ महिला २ सय २८ पुरुष छन् ।

११ वर्षदेखि २० वर्ष उमेर समूहका १ सय ५८ जना संक्रमित भएका छन् भने ३१ देखि ४० वर्ष उमेर समूहका १ सय ४९ जना संक्रमित भएका छन् । सामाजिक विकास मन्त्रालयका अनुसार १० वर्षदेखि मुनी १९ जना संक्रमित भएका छन् । ४१ देखि ५० मा ७३, ५१ देखि ६० मा २२, ६१ देखि ७० वर्ष उमेर समूहका ७ जना छन् । ७० वर्ष माथिका संक्रमित प्रदेश १ मा छैनन् ।

५ वटा आईसोलेसन केन्द्रबाट उपचार

प्रदेश १ मा कोरोना संक्रमितको उपचारका लागि ५ स्थानमा आईसोलेसन केन्द्र सञ्चालन गरिएको छ । विराटनगरबाट संक्रमितको उपचार शुरु गरिएको थियो ।

शुक्रबार सम्म सञ्चालित आईसोलेसन केन्द्र ५ पुगेको छ । कोशी अस्पताल कोभिड १९ उपचार केन्द्र विराटनगरमा ३२, पूर्वाञ्चल विश्वविद्यालय कोभिड १९ आईसोलेसन अस्पताल गोठगाँउमा ५८, वीपी कोइराला स्वास्थ्य विज्ञान प्रतिष्ठान धरानमा ४१, कोभिड १९ आईसोलेसन केन्द्र चौदण्डीगढी उदयपुरमा २१ र जिल्ला अस्पताल खोटाङमा १ जना रहेका छन् । संक्रमण देखिएका १० जनाको व्यवस्थापनको काम भईरहेको मन्त्रालयका प्रवक्ता डा. सुरेश मेहताले बताए ।

झापामा संक्रमित ३ सय नजिक

प्रदेश १ मा सबैभन्दा बढी कोरोना संक्रमित झापामा भएका छन् । शुक्रबार सम्म झापामा संक्रमितको संख्या २ सय ९८ पुगेको छ ।

सामाजिक विकास मन्त्रालयका अनुसार मोरंगमा १ सय ८३, सुनसरीमा ९८, उदयपुरमा ७२, इलाममा १३, खोटाङमा ११, धनकुटामा ८, भोजपुरमा ६, संखुवासभामा ५, तेह्रथुम र ताप्लेजुङमा ३–३, ओखलढुङ्गा र संखुवासभामा १–१ संक्रमित छन् । शुक्रबार सम्म संक्रमित मध्ये ५ सय ४१ डिस्चार्ज भएका छन् ।