तीन वटा निजी प्रयोगशालाले पाए कोरोना परीक्षणको अनुमति, स्याम्पल लिन भने नपाउने

कोरोना भाइरसको पीसीआर विधिबाट परीक्षणका लागि ३ वटा निजी प्रयोगशालाले अनुमति पाएका छन्।

अनुमति पाउनेमा स्टार हस्पिटल ललितपुर, सेन्ट्रल डाइनोस्टिक ल्याबोरेटरी र काठमाडौं मेडिकल कलेज छन् ।

स्वास्थ्य मन्त्रालयले तोकेको मापदण्ड पूरा गरेका ३ वटा प्रयोगशालालाई परीक्षण गर्न अनुमति दिएको राष्ट्रिय जनस्वास्थ्य प्रयोगशालाका सूचना अधिकारी राजेश गुप्ताले जानकारी दिए ।

गुप्ताका अनुसार अनुमति पाएका प्रयोगशालले आफैँ नमुना संकलन गर्न भने पाउँदैनन्। उनीहरुले सरकारले संकलन गरेको नमुना नै परीक्षण गर्ने हुन्। सरकारी ल्याबले परीक्षण गर्न नभ्याएको अवस्थामा मात्रै निजीमा परीक्षण गरिनेछ । निजीमा परीक्षण गराउँदा सरकारले प्रतिनमुना ५ हजार ५०० रुपैयाँ तिर्नेछ ।

हाल सरकारी स्तरमा ३३ वटा प्रयोगशालाबाट कोरोना परीक्षण भइरहेको छ । निजी क्षेत्रबाट पनि परीक्षण हुने भएपछि परीक्षणको दायरा बढ्ने सूचना अधिकारी गुप्ता बताउँछन् ।

स्वास्थ्यमन्त्री भानुभक्त ढकालले असार १५ बाट दैनिक १० हजार नमुना परीक्षण हुने भने पनि त्यो हुन सकेको छैन । हाल ७ हजारको हाराहारीमा दैनिक परीक्षण हुँदै आएको छ ।

भदौ पहिलो सातासम्म ४० हजार संक्रमित हुने प्रक्षेपण सरकारको छ । हाल कोरोना संक्रमितको संख्या १३ हजार २४८ पुगेको छ भने २ लाख २३ हजार ६३० नमुना पीसीआर विधिबाट परीक्षण भएका छन् ।