विराटनगर – प्रदेश १ मा कोरोना भाइरस संक्रमण भएर उपचार गराइरहेका ८ महिने बालिकासहित १४ जना डिस्चार्ज भएका छन्।
कोसी अस्पताल कोभिड १९ उपचार केन्द्रमा उपचाररत झापाका ६, मोरङका ४, सुनसरीका ३ र पाँचथरका १ जना सोमबार डिस्चार्ज भएका हुन्। डिस्चार्ज हुनेमा विराटनगर १० की ८ महिने बालिका देखि ५४ वर्षसम्मका छन्।
कोभिड उपचार केन्द्रमा जेठ २७ गतेदेखि असार ५ गतेसम्म भर्ना भएकाहरु डिस्चार्ज भएको कोभिड १९ उपचार केन्द्र व्यवस्थापन समितिका सदस्य ध्रुव उरावले बताए। प्रदेश १ मा डिस्चार्ज हुनेको संख्या ३ सय ९२ पुगेको छ।
प्रदेश १ मा सोमबार ७ जना कोरोना संक्रमित थपिएका छन्। सामाजिक विकास मन्त्रालयका अनुसार विराटनगरमा १ जना महिला, उदयपुरको ताप्लीका २ पुरुष, खोटाङ दिक्तेलका २ महिला र २ पुरुष छन्।
प्रदेश १ मा कोरोना संक्रमितको संख्या ५ सय ६७ पुगेको छ।
प्रकाशित: Jun 29, 2020| 17:40 सोमबार, असार १५, २०७७
