मोरङमा आगो निभाउने क्रममा ६ जना घाइते

विराटनगर– मोरङको सुन्दर हरैंचा नगरपालिका–१२ विराटचोकमा होटल एवं खाजा घरमा लागेको आगो निभाउने क्रममा ६ जना घाइते भएका छन्।

घाइते हुनेमा सुन्दर हरैंचा– १२ का ५६ वर्षीय छत्रबहादुर थापा, सुन्दरहरैंचा–९ का ४२ वर्षीय गोविन्द दाहाल, ३३ वर्षीय खगेन्द्र लुइँटेल, ३८ वर्षीय रणबहादुर बस्नेत, सुन्दरहरैंचा –१० का ४२ वर्षीय बाबुराम बस्नेत र ४५ वर्षीय अम्बिकाप्रसाद ढुंगेल छन्।

मोरङ प्रहरी प्रमुख एसपी सन्तोष खड्काले होटलमा लागेको आगो निभाउने क्रममा उनीहरू पोलेर घाइते भएको जानकारी दिए।

विराटचोकमा रहेका तीनवटा होटल एवं खाजा घरमा सोमबार बिहान १ बजेतिर आगलागी भएको थियो।

मन्दिरा न्यौपानको ए–वान खाजा घरदेखि सुरु भएको आगो फैलिएर अर्चना पोख्रेलको पोख्रेल स्टाफ होटल र रमेश डंगोलको धनकुटे समिर स्टाफ होटलमा पनि क्षति पुगेको एसपी खड्काले जानकारी दिए।

बाँसको टाटी र कर्कटपाताको छानो लगाएर बनाइएका होटलमा भएको आगलागीबाट अनुमानित १० लाखको क्षति भएको अनुमान गरिएको छ। आगो एक घण्टापछि निभाइएको थियो।