भारतमा नियन्त्रणबाहिर जाँदै कोरोना, एकै दिनमा २० हजार बढी संक्रमित

काठमाडौं- तिब्र गतिमा फैलिएको कोरोना भाइरसबाट भारतमा शनिबार एकै दिनमा २० हजार १ सय ३१ जना संक्रमित भएका छन् ।

भारतमा एकै दिनमा यति धेरै संक्रमित थपिएको यो पहिलो पटक हो । यसअघि शुक्रबार १८ हजार २ सय ७६, बिहीबार १८ हजार १ सय ८५, बुधबार १६ हजार ८ सय ७० जनामा संक्रमण पुष्टि भएको थियो ।

दिनहुँ १५ देखि २० हजारमा संक्रमण देखिन थालेसँगै भारतमा कोरोना नियन्त्रण बाहिर पुगेको स्वास्थ्य विज्ञहरुले बताउन थालेका छन् । सबै राज्यमा समुदाय स्तरमा तिब्र रुपमा फैलिएका कारण यो नियन्त्रण बाहिर पुगेको विज्ञहरुको भनाइ छ।

भारतमा संक्रमितहरुले हत्तपत्त अस्पतालमा भर्ना पाउने छाडेका छन् भने क्वारेन्टाइन र घरमै राखेर उपचार गर्न थालिएको छ । कयौंले डाक्टर र अस्पतालसमेत देख्न नपाउने अवस्था बन्दै गएको छ ।

भारतमा आइतबार बिहानसम्ममा ५ लाख २९ हजार ५ सय बढि संक्रमित भएका छन् भने १६ हजार १ सय ३ जनाको मृत्यु भएको छ ।

भारतको महाराष्ट्रमा मात्रै १ लाख ५९ हजार १ सय ३३ जना संक्रमित भएका छन् भने ७ हजार २ सय ७३ जनाको मृत्यु भएको छ ।

यस्तै दिल्लीमा ८० हजार १ सय ८८ जनामा संक्रमण पुष्टि भएको छ भने २ हजार ५ सय ५८ जनाको मृत्यु भएको छ ।

तमिलनाडुमा ७८ हजार ३ सय ३५ जना संक्रमित हुँदा १ हजार २५ जनाको मृत्यु भएको छ। गुजराजमा ३० हजार ७ सय ७३ जनामा संक्रमण पुष्टि हुँदा १ हजार ७ सय ९० जनाको मृत्यु भएको छ ।