प्रदेश २ मा १८५ जनामा कोरोना संक्रमण पुष्टि

प्रदेश २ मा मंगलबार एकै दिन ७ महिलासहित १८५ जना कोरोनाका नयाँ संक्रमित थपिएका छन् । १८५ जना थपिएसँगै प्रदेश २ मा कोरोना संक्रमितको संख्या २ हजार ३७७ पुगेको छ ।

मंगलबार सबैभन्दा बढी महोत्तरीमा ८९ जनामा संक्रमण पुष्टि भएको सामाजिक विकास मन्त्रालयले जनाएको छ । महोत्तरीको मटिहानी, लोहारपट्टी र औरही नगरपालिकास्थित क्वारेन्टिनमा रहेका ८९ जनामा संक्रमण पुष्टि भएको मन्त्रालयका सचिव रामप्रसाद घिमिरेले जानकारी दिए । महोत्तरीमा संक्रमितको संख्या ३०७ पुगेको छ ।

यसैगरी रौतहटमा ५२ जनामा संक्रमण पुष्टि भएको छ । जिल्लाको यमुनामाई र बौधीमाई नगरपालिकाका क्वारेन्टिनमा रहेकाहरुमा संक्रमण पुष्टि भएको हो । यससँगै रौतहटमा कोरोना संक्रमितको संख्या ८९४ पुगेको छ ।

धनुषाको २१ जनामा संक्रमण पुष्टि भएको मन्त्रालयले जनाएको छ । यसका साथै धनुषामा कोरोना संक्रमितको संख्या १८५ पुगेको छ ।

यसैगरी सर्लाहीको १६ जनामा संक्रमण पुष्टि भएको मन्त्रालयले जनाएको छ । १६ जना थपिएसँगै सर्लाहीमा कोरोना संक्रमितको संख्या ५२७ पुगेको छ ।

मंगलबार सप्तरीमा ३, सिरहामा २ र पर्सामा २ जनामा संक्रमण पुष्टि भएको मन्त्रालयले जनाएको छ । संक्रमण पुष्टि भएका धनुषा, सप्तरी, सिरहा र पर्साको स्थानबारे मन्त्रालयले स्पष्ट पारेको छैन् ।

पछिल्लो २४ घण्टामा बारामा संक्रमण पुष्टि नभएको मन्त्रालयले जनाएको छ । बारामा संक्रमितको संख्या ९६ रहेको जनाइएको छ ।