कर्णालीमा थप १९१ जना संक्रमणमुक्त

काठमाडौं- कर्णाली प्रदेशमा थप एक सय ९१ कोरोना भाइरस (कोभिड-१९) संक्रमित उपचारपछि निको भएर घर फर्किएका छन्।

प्रदेशको स्वास्थ्य सेवा महाशाखाका अनुसार दैलेख अस्पतालबाट एक सय २०, दुल्लु अस्पतालबाट २७, सल्यान अस्पतालबाट ४१ र हिजो डिस्चार्ज भएर छुटेका तीन जना संक्रमित कोरोनामुक्त भएका हुन्।

यससँगै कर्णालीमा उपचारपछि कोरोनामुक्त भई घर फर्किनेको संख्या तीन सय ४२ पुगेको छ।

यस्तै, त्यहाँ थप ९ जनालाई कोरोना भाइरस संक्रमण पुष्टि भएको छ। महाशाखाका अनुसार मंगलबार दैलेखका पाँच र सुर्खेतका चार जनालाई कोरोना संक्रमण देखिएको हो।

महाशाखा प्रमुख डा. लक्ष्मीनारायण तिवारीले मंगलबार जारी गरेको प्रेस विज्ञप्ति अनुसार दैलेखको दुल्लु नगरपालिका वडा नम्बर ३, ५ र ११ का एक एक पुरुषलाई कोरोना संक्रमण देखिएको छ। सोही नगरपालिकाको वडा नम्बर ७ का दुई पुरुष पनि संक्रमित भएका छन्।

यस्तै, सुर्खेतको गुर्भाकोट नगरपालिका वडा नम्बर ११ र १२ का एक एक पुरुष तथा भेरीगंगा नगरपालिकाका एक पुरुष र एक महिलालाई कोरोना पोजेटिभ देखिएको छ। हाल ती सबै स्वास्थ्यकर्मीको सम्पर्कमा रहेको उनले जनाएका छन्।