लालझाडीमा वन्यजन्तु निगरानीको लागि ‘क्यामेरा ट्रयापिङ’

कञ्चनपुर– कञ्चनपुरको लालझाडी संरक्षित वन क्षेत्रका वन्यजन्तुको अवस्थाबारे अध्ययन गर्न ‘क्यामेरा ट्रयाापिङ’ गर्न थालिएको छ।

बासस्थान, वन्यजन्तुका प्रजाति पहिचान, चाेरी शिकारी नियन्त्रण र संख्या एकीन गर्न ट्रयापिङ सुरु गरिएको हो।

जेठको पहिलो सातादेखि संरक्षित वन क्षेत्र बाहेकको क्षेत्रमा ट्रयापिङको कार्य भइरहेको डिभिजन वन कार्यालय कञ्चनपुरका प्रमुख अजयविक्रम मानन्धरले जानकारी दिए।

“वन्यजन्तुको अवस्था पहिचानसँगै वन्यजन्तुको चोरी शिकारी र वनपैदावार तस्करी गर्नेहरुको पहिचान गर्नका लागि क्यामेरा ट्रा्यापिङको कार्य अगाडि बढाएका छौँ,” उनले भने।

तराई भूपरिधि कार्यक्रम (ताल)को सहयोगमा संरक्षित वन क्षेत्रमा उक्त कार्य भइरहेको छ। संरक्षित वन क्षेत्रको चुरेदेखि तराईका क्षेत्रसम्म ४० वटा स्वचालित क्यामेरा जडान गरिएका छन्।

क्यामेरा ट्रयापिङको सहायताले गरिएको अध्ययनमा हालसम्म चित्तल, ठूलो बिरालो, चितुवा, निलगाई, बँदेललगायतका जनावर देखा परेका छन्।
संरक्षित वन क्षेत्रमा जडान गरिएका मध्ये तीनवटा क्यामेरा चोरी भएका छन्।

रासस