लकडाउन खुकुलो भएसँगै भारतमा कोरोना झनै फैलियो, एकै दिनमा १० हजारभन्दा बढी संक्रमित

काठमाडौं– तिब्र गतिमा फैलिएको कोरोना भाइरसबाट भारतमा एकैदिनमा १० हजार २ सय १८ जना संक्रमित भएका छन् । पछिल्लो २४ घण्टामा कोरोनाबाट २ सय ७७ जनाले ज्यान गुमाएका छन् ।

भारतमा एकै दिनमा १० हजार व्यक्ति संक्रमित भएको यो तेस्रो पटक हो । यसअघि जेठ २५ गते आइतबार १० हजार ८ सय ६४ जना संक्रमित भएका थिए भने जेठ २४ गते शनिबार १० हजार ४ सय ३८ जनामा संक्रमण पुष्टि भएको थियो ।

लकडाउन खुकुलो बनाएसँगै भारतमा संक्रमण तिब्र गतिमा फैलिएको छ । बजार, पसल, उद्योगधन्दा र यातायातका साधन चल्न थालेपछि दिनहुँ ८ देखि १० हजार व्यक्तिमा संक्रमण पुष्टि हुँदै आएको छ ।

अहिलेसम्म २ लाख ७६ हजार १ सय ४६ जना संक्रमित भएका छन् भने ७ हजार ७ सय ५० जनाको मृत्यु भएको छ । १ लाख ३४ हजार ६ सय ७० जना निको भएर घर फर्किएका छन् ।

भारतमा सबैभन्दा बढि कोरोनाबाट महाराष्ट्र राज्य प्रभावित भएको छ । जहाँ ९० हजार ७ सय ८७ संक्रमित भएका छन् भने ३ हजार २ सय ८९ जनाको मृत्यु भएको छ ।

दोस्रो प्रभावित तमिलनाडुमा ३४ हजार ९ सय १४ जना संक्रमित भएका छन् भने ३ सय ७ जनाको मृत्यु भएको छ ।

दिल्लीमा २९ हजार ९ सय ४३ जनामा संक्रमण पुष्टि हुँदा ८ सय ७४ जनाको मृत्यु भएको छ । गुजरातमा २१ हजार ४४ जना संक्रमित हुँदा १ हजार ३ सय १३ जनाको मृत्यु भएको छ ।