लकडाउनको मोडालिटीबारे आज निर्णय हुने, मन्त्रिपरिषद् बैठकअघि प्रधानमन्त्रीको सम्बोधन

काठमाडौं– सरकारले गएको चैत ११ गतेदेखि जारी बन्दाबन्दी (लकडाउन)को स्वरुप परिवर्तनबारे आज औपचारिक निर्णय गर्ने भएको छ ।

दिउँसो २ बजे प्रधानमन्त्री निवास बालुवाटारमा बस्ने बैठकले असार १ गतेबाट क्रमशः लकडाउन खुकुलो बनाउँदै खोल्ने विषयमा निर्णय गर्न लागेको हो ।

लकडाउन खोल्ने विषयमा उच्चस्तरीय समन्वय समितिका संयोजकसमेत रहेका उपप्रधान तथा रक्षामन्त्री ईश्वर पोखरेलले प्रस्ताव पेश गर्नेछन् ।

समितिले पाँच चरणमा लकडाउन खोल्ने योजनासहितको कार्यनीति तयार पारेको छ । साढे २ महिनामा लकडाउन पूर्ण रुपमा खोल्ने गरी पाँच चरण अर्थात् दस हप्ते योजना तयार पारेको समिति सदस्य समेत रहेका स्वास्थ्यमन्त्री भानुभक्त ढकालले नेपाल समयलाई जानकारी दिए ।

उक्त योजना अनुसार असार १ बाट कृषिसँग जोडिएका क्षेत्र, पसल, उद्योग, हवाई यातायात आशिंक रुपमा चल्न दिइने भएको छ । विद्यालय, सार्वजनिक यातायात, मनोरञ्जनका क्षेत्र, खेलकुदका गतिविधि भने अबको एक महिनापछि मात्रै चल्ने कार्यनीतिमा उल्लेख छ ।

सर्वसाधारण र व्यवसायीले स्वस्फूर्त रुपमा लकडाउन तोड्न थालेपछि सरकार बाध्य भएर लकडाउन खुकुलो बनाउने मनस्थितिमा पुगेको हो । केही दिनयता काठमाडौंलगायत देशका विभिन्न स्थानमा व्यापारी र प्रहरीबीच पसल खोल्ने विषयमा विवाद हुँदै आएको छ ।

सरकारले अहिलेसम्म आठ पटक लकडाउनको अवधि थपेर जेठ ३२ गतेसम्म लकडाउन लम्व्याएको छ। नेपालमा चैत ११ गतेबाट लकडाउन सुरु भएको हो ।

प्रधानमन्त्रीको सम्बोधन
मन्त्रिपरिषद्को बैठकले लकडाउनबारे निर्णय गर्नुअघि आज बिहान ११ बजे प्रधानमन्त्री केपी शर्मा ओलीले राष्ट्रका नाममा सम्बोधन गर्ने भएका छन् ।

लकडाउनको नयाँ स्वरूप (मोडालिटी) बारे प्रधानमन्त्रीले सम्बोधन गर्ने कार्यक्रम रहेको सचिवालयले जनाएको छ।

लकडाउनको मोडालिटी तय गर्न प्रधानमन्त्री ओलीले अघिल्लो हप्ता विज्ञहरुसँग छलफल गरेका थिए।