पैसा उठाएर पीसीआर मेसिन खरिद गर्दै वीरगन्ज महानगर

कोरोना परीक्षण गर्ने पिसिआर मेशिन खरिद प्रक्रियाका लागि वीरगन्ज महानगरपालिकाले आह्वान गरेको बोलपत्र मंगलबारसम्म पाँच थान बिक्री भएको छ ।

वीरगन्जमा कोरोना संक्रमतिहरुको संख्या बढ्दै गएपछि रोकथाम तथा नियन्त्रणको लागि बृहत परिक्षण गर्नुपर्ने आवश्यकतालाई मध्यनजर गर्दै मेशिन खरिदको लागि ५ दिने बोलपत्र प्रकाशन गरेको थियो ।

संघ तथा प्रदेश सरकारबाट मेशिन खरिदको लागि कुनै किसिमको आशा नदेखेपछि वीरगन्ज महानगरपालिकाले यहाँकै नागरिकहरुको सहयोगमा मेशिन खरिद गर्ने अठोट लिएर सहयोगको लागि आह्वान गरेको थियो ।

पिसीआर मेशिन तथा किट खरिदका लागि महानगर प्रमुख बिजय कुमार सरावगीले आम नगरवासी, पर्साका स्थानीय सरकार र पर्सावासीलाई आर्थिक सहयोगको लागि अपिल गरेका थिए ।

विभिन्न दाताहरुबाट सहयोग प्राप्त हुन थालेपछि महानगरपालिकाले गत शुक्रबार पिसिआर मेशिन खरिद सम्बन्धी पाँच दिने बोलपत्र प्रकाशन गरेको थियो । पिसीआर मेशिन तथा किट खरिदको मनसाय राखेर पाँचवटा कम्पनीले बोलपत्र खरिद गरेका छन् । सार्वजनिक खरिद ऐनले निर्दिष्ट गरे अनुसार पिसीआर मेशिन खरिद प्रक्रियाबाट अगाडि बढेको वीरगन्ज महानगरपालिकाले जनाएको छ ।

मंगलवार नै वीरगन्जका उद्योगी ब्यवसायीले पिसीआर मेशिन खरिदका लागि आर्थिक सहयोग समेत गरेका छन् ।

वीरगन्ज उद्योग वाणिज्य संघले ११ लाख ११ हजार १ सय ११ रुपैयाँ, उद्योगपति बिरेन्द्र संघाइले २० लाख, बाबुलाल चाचानले १० लाख, अनिल रुँगटाले ५ लाख, राजेश अग्रवालले ६ लाख, आत्मराम काबराले ५ लाख, मुरलीधर रुँगटाले ५ लाख, अशोक बैदले २ लाख, सत्यनारायण क्यालले २ लाख, हिरालाल केडियाले ५ लाख, चीरन्जीवी लाल सरावगीले १ लाख सहयोग गरेका थिए ।