न्याय सेवाका दुई सहसचिवको सचिव र ८५ जनाको अधिकृतमा बढुवा

काठमाडौं- न्याय सेवा आयोगको सोमबार बसेको बैठकले दुई जनाको सहसचिवबाट सचिव र ८५ जनालाई नासुबाट अधिकृतमा बढुवा गरेको छ।

आयोगको सोमबार बसेको अर्थ मन्त्रालयमा कानुन अधिकृत रहेका सहसचिव उदयराज सापकोटालाई सचिवमा बढुवा गरेको छ। बढुवासँगै सापकोटालाई सत्य निरुपण तथा मेलमिलाप आयोगको सचिवको जिम्मेवारी तोकिएको छ।

यस्तै, कानुन मन्त्रालयका सहसचिव धनराज ज्ञवालीको पनि सचिवमा बढुवा भएको छ। उनलाई प्रधानमन्त्री तथा मन्त्रिपरिषद्को कार्यालयमा पदस्थापन गरेको छ।

आयोगले सत्य निरुपण तथा मेलमिलाप आयोगको सचिव रहेका ऋषिराज भण्डारीलाई कानुन मन्त्रालयमा सरुवा गरेको छ।
बैठकले चार जना उपसचिव र १५ जना अधिकृतको सरुवासमेत गरेको छ। उच्च अदालत, तुल्सीपुरका उपरजिस्ट्रार प्रेम खड्कालाई जिल्ला अदातल, रोल्पाको स्रेस्तेदारमा सरुवा गरिएको छ।

यस्तै, उच्च अदालत, दिपायलको महेन्द्रनगर इजलासका उपरजिस्ट्रार तीर्थराज भट्टलाई बाँके जिल्ला अदालतको स्रेस्तेदारमा सरुवा गरिएको छ। सर्वोच्च अदालतका इजलास अधिकृत जगतबहादुर पौडेललाई उच्च अदालत दिपायलको महेन्द्रनगर इजलासको रजिस्ट्रारमा सरुवा गरिएको छ।

जिल्ला अदालत, बाँकेका स्रेस्तेदार यदुराज शर्माको कञ्चनपुर जिल्ला अदालतको स्रेस्तेदारमा सरुवा गरिएको छ।