४ वर्षमा ३ पटक संन्यास घोषणा गरे विश्व च्याम्पियन म्याकग्रेगरले

एजेन्सी- आयरल्यान्डका मिक्स्ड मार्सल आर्टस् (एमएमए) का खेलाडी कोनोर म्याकग्रेगरले खेल जीवनबाट संन्यासको घोषणा गरेका छन्। उनले खेल जीवनबाट तेस्रो पटक संन्यासको घोषणा गरेका हुन्।

आमाको साथ खिचिएको एक पुरानो तस्बिर सामाजिक सञ्जाल ट्वीटरमा राख्दै उनले भने, ‘मैले एमएमए फाइटिङबाट संन्यास लिने घोषणा गरेको छु। मेरो जीवनको अद्भूत यादको लागि तपाईँहरू सबैलाई धन्यवाद। म तपाईँ सबैलाई माया गरिरहन्छु। आफ्नो सपनाको घर बनाउनु होला। तपाइँ जस्तो चिजको सपना देख्नुहुन्छ त्यस्तै पाउनुहुनेछ।’

उनी मिक्स्ड मार्सल आर्टको सबैभन्दा लोकप्रिय खेलाडीसमेत हुन्। साथै युएफसीको दुई अलग अलग विधाका विश्व च्याम्पिन हुन्।

यूएफसी स्टारले गत सालको मार्चमा पनि संन्यासको घोषणा गरेका थिए। संन्यास घोषणा गर्दै त्यतिबेला उनले भनेका थिए, ‘मैले संन्यास लिनले फैसला गरेको छु। म आफ्ना सबै पुराना साथीहरुको भविष्यको लागि शुभकामना दिन चाहान्छु।’

यद्यपी यो सालको सुरुमा उनले आफ्नो संन्यासको फैसलाबाट यू–टर्न लिँदै समर्थकको सहारामा अघि बढ्न चाहेको बताएका थिए।

उनको नयाँ फैसलाले आफूलाई राम्रो बनाउने चुनौती दिएको पनि बताएका थिए। सो वक्तव्यपछि उनी यो वर्षको जनवरीमा रिङमा फर्किए।

उनले पहिलोपटक सन् २०१६ मा संन्यासको घोषणा गर्दै सबै समर्थकलाई आश्चर्यमा पारेका थिए। ‘म युवा खेलाडी हुँदा नै खेल जीवनको अन्त्य भएको घोषणा गर्न च हान्छु। तपाईँको मायाका लागि धन्यवाद,’ उनले ४ वर्षअघि संन्यासको घोषणा गर्दै भनेका थिए।

तर त्यसपछि पनि उनले मिक्स्ड मार्सल आर्टमा निरन्तर सहभागी बनिरहे।