खेलेर भन्दा इन्स्टाग्राम पोस्टबाट धेरै कमाउँछन् रोनाल्डो

एजेन्सी- पोर्चुगलका फरवार्ड क्रिस्टियानो रोनाल्डोले युभेन्टसबाट फुटबल खेलेर भन्दा इन्स्टाग्रामबाट १४ मिलियन पाउन्ड धेरै कमाइ गरेका छन्। उनी इन्स्टाग्रामबाट सर्वाधिक कमाइ गर्ने व्यक्तिसमेत हुन्।

उनले एक वर्षमा इन्स्टाग्राममा स्पोन्सर पोस्टबाट ४१.७ मिलियन पाउन्ड कमाइ गरेका छन्। युभेन्टसमा उनको वार्षिक तलब २७.३ मिलियन पाउन्ड रहेको छ। तर अहिले कोरोना भाइरसको महामारीका कारण उनको वार्षिक तलबको एक तिहाइ काटिएको छ।

३५ वर्षीय रोनाल्डोको इन्स्टाग्राममा २२ करोड फलोअर्स छन्। उनले इन्स्टाग्रामको एक पोस्टबाट औसत ९ लाख ७१ हजार पाउण्ड कमाउँछन्। पाँच पटकका बेलोन डोर विजेता रोनाल्डोले सन् २०१९ भन्दा ३.५ मिलियन कमाइ धेरै गरेका हुन्।

उनले केही वर्षदेखि सामाजिक सञ्जालमा नाइक, इएमइस ट्रेनिङ डिभाइस सिक्सप्याड को विज्ञापन गर्ने गर्दै आएका छन्।

त्यस्तै इन्स्टाग्रामबाट दोस्रो धेरै कमाई गर्ने खेलाडी लियोनेल मेस्सी छन्। उनले यो वर्ष २५.२ मिलियन पाउन्ड आर्जन गरेका छन्। उनले प्रतिपोस्ट ६ लाख ३१ हजार कमाई गर्ने गरेका छन्।

उनले एडिडास र ग्लोब ट्रोटिइङ लाइफस्टाइलको विज्ञापन गर्ने गरेका छन्।