एजेन्सी– हंगेरी सरकारले विभिन्न खेलमा दर्शकको उपस्थितिलाई खुला गरिदिएको छ। उसले सामाजिक दूरी पालना गरेर बस्ने सर्तमा रंगशालामा दर्शकको प्रवेश अनुमति दिएको हो।
खेल हेर्न आउने दर्शकले प्रत्येक तीन सिट छोडेर बस्नुपर्ने छ। त्यस्तै एउटै कोलमको सिधा पनि बस्न पाइने छैन। खेलाडी र अन्य खेलसँग सम्बन्धित मानिसले खेलअघि कोरोना टेस्ट गराएर नेगेटिभ रिजल्ट आएको प्रमाणित गर्नुपर्ने हुन्छ।
हंगेरी सकर फेडेरेसनले पुनः एकपटक हंगेरीमा खेलका क्रममा दर्शक देख्न पाइने बताएको छ। उसले भनेको छ, ‘तर खेलमा दर्शकको अघि खेल्ने वा खाली स्टेडियममै खेल्ने भन्ने अन्तिम निर्णय गर्न क्लबलाई छुट दिइएको छ।’
अर्को बुधबार बुढापेस्ट होन्वेद र मेजोकोवेस्दज्सोरीबीच हुने हंगेरियन कप फाइनलको टिकट चाँडै विक्री सुरु गरिने फेडेरेसनले जानकारी दिएको छ।