ला लिगा जुन ८ बाट सुरु हुन सक्ने स्पेनिस प्रधामन्त्रीको भनाइ

स्पेनका प्रधानमन्त्री पेद्रो सान्चेले ला लिगा जुन ८ मा सुरु हुन सक्ने बताएका छन्। उनले बन्द रंगशालामा खेल गर्ने गरी लिग सुरु हुन सक्ने बताएका हुन्।

लिगका अध्यक्ष जावियर तेवासले केही दिनअघि जुन १२ बाट लिग सुरु हुने बताएका थिए। उनले भने, ‘मलाई विश्वास छ– ला लिगा जुन १२ बाट सुरु हुनेछ। तर, अहिलेसम्म सुरु हुने मिति निश्चित भइसहेको छैन।’

“नयाँ आशाको किरणसँगै स्पेनले गतिविधि अघि बढाउन थालेको छ। त्यसैले अब सबै दैनिक क्रियाकलाप पहिलेझैं सहज बनाउने समय आएको छ,” उनले भने, “स्पेनिस फुटबलका विश्वभर समर्थक छन्। जुन ८ बाट फुटबललगायत धेरै क्रियाकलाप सुरु हुनेछन्।”

ला लिगाका खेलाडीले यही साताबाट १० जनाको समूह बनाएर प्रशिक्षण थालेका छन्। लिगको पहिलो खेलमा रियल बेटिस र सेभिल्लाबीच हुने निश्चित भएको छ।

त्यस्तै, स्पेनको दोस्रो डिभिजनको सेकुन्डा पनि ला लिगासँगै सुरु हुने भएको छ। कोरोना भाएरसको महामारीका कारण १२ मार्चबाट स्पेनमा खेल गतिविधि भएका छैनन्।

जारी सिजनमा ला लिगाका १२ खेल बाँकी छन्। लिगको शीर्ष स्थानमा बार्सिलोना छ भने रियल मड्रिडले २ अंक पछि रहेर बार्सिलोनालाई पछ्याइरहेको छ।