काठमाडौंमा आज सफाइ कर्मचारीको कोरोना परीक्षण गरिँदै

काठमाडौं - काठमाडौं उपत्यकामा कोरोना संक्रमणको जोखिम हुन नदिन महानगरपालिकाले कोरोना परीक्षणलाई निरन्तरता दिएको छ।

बिहीबार कालीमाटी तरकारी बजार विकास समितिमा कार्यरत कर्मचारी, थोकबिक्रेता, मजदूर तथा चालक गरी एक हजार ३४ को परीक्षण गरिएको थियो। ती मध्ये ७०० जनाको आरडिटी र ३३४ जनाको पीसीआर परीक्षण गरिएको हो। आरडिटी गरिएकामध्ये चार जनाको नतिजा पोजेटिभ देखिएको र पीसीआरको नतिजा आउन बाँकी रहेको महानगर जनस्वास्थ्य महाशाखा प्रमुख नरेन्द्रविलास बज्राचार्यले जानकारी दिए।

सफाइ क्षेत्रमा काम गर्ने कर्मचारीको आज परीक्षण गरिरहेको महानगरपालिकाले जनाएको छ। सफाइ कर्मचारी र फोहरमैला संकलन गर्नेहरुको आरडिटी र पीसीआर दुवै विधिबाट परीक्षण गर्न लागिएको हो। महानगरका ९५० कर्मचारी सफाइ क्षेत्रमा कार्यरत छन् । अहिले उनीहरुको टेकुमा आरडिटी र पीसीआरका लागि स्वाब संकलन भइरहेको छ।

संक्रमणको पहिचान गरी थप सुरक्षित बन्नका लागि क्रमशः जनप्रतिनिधि, स्वास्थ्यकर्मी, महिला स्वास्थ्य स्वयंसेविका र सञ्चारकर्मीको परीक्षण गर्ने तयारी भएको महानगर प्रमुख विद्यासुन्दर शाक्यले जानकारी दिए।