कांग्रेसमा लगानी, पूर्वाधार र रोजगारसम्बन्धी विशेष समिति

काठमाडौं- नेपाली कांग्रेसले ‘लगानी, पूर्वाधार र रोजगार दृष्टिकोण : दिगो परियोजना विशेष समिति’ गठन गरेको छ।

केन्द्रीय समितिले कोरोना भाइरसका कारण देशका विभिन्न क्षेत्रमा परेको असर अध्ययन गरी आवश्यक कार्य गर्न विभिन्न समिति गठन गर्ने निर्णय गरेबमोजिम सभापति शेरबहादुर देउवाले ‘लगानी, पूर्वाधार र रोजगार : दृष्टिकोण एवं दिगो परियोजना विशेष समिति’ गठन गरेका हुन्।

समितिलाई कोरोनाका कारण नेपालको लगानी, पूर्वाधार र रोजगारका क्षेत्रमा परेको असरलाई तत्कालीन र दूरगामी रूपमा सम्बोधन गर्न सकिने नीतिबारे आवश्यक अध्ययनपछि पार्टीको ‘अर्थतन्त्र केन्द्रित विशेष समिति’ सुझाव दिने जिम्मेवारी तोकिएको छ।

यस्तै समितिले दीर्घकालीन रूपमा लगानी, पूर्वाधार र रोजगारका क्षेत्रमा दूरगामी दृष्टिकोण साथ दिगो परियोजनाको परिकल्पना र कार्यान्वयनमा भूमिका निर्वाह गर्नेछ।

विनोद चौधरीको संयोजकत्वमा गठित समितिमा दीपक खड्का, उमेश श्रेष्ठ, इन्द्र बानियाँ, टेकबहादुर गुरुङ र कर्मा घले
सदस्य छन्।  यस्तै अन्य सदस्यमा जिपछिरिङ लामा, छत्र गिरी, श्री सूर्यबहादुर केसी, मोहन आचार्य, तेजुलाल चौधरी छन्।

समिति सदस्यमा अनिल रुंगटा, विष्णुबहादुर खड्का, पूर्णबहादुर तामाङ र खगेश्वर बोहरा सदस्य छन्।
समितिको संख्या २१ मा नबढ्ने गरी थप गरिने कांग्रेस केन्द्रीय कार्यालयले जनाएको छ।