जनकपुरका पत्रकार पनि कोरोनाबाट संक्रमित

वीरगञ्जमा दुई जना पत्रकार कोरोना भाइरसबाट संक्रमित भएकै दिन जनकपुरमा पनि एक पत्रकार संक्रमित भएको खुलेको छ ।

मंगलबार बेलुका थपिएका २६ कोरोना संक्रमितमध्ये एक जना जनकपुरका पत्रकार रहेको धनुषाका प्रमुख जिल्ला अधिकारी कोषहरि निरौलाले जानकारी दिए ।

४० वर्षीय पुरुष पत्रकार लामो समयदेखि जनकपुरमै रहेको उनले बताए। घर र कार्यालय मात्रै आउजाउ गर्ने गरेका ती पत्रकारमा कसरी कोरोना सर्यो भन्ने विषयमा अनुसन्धान सुरु गरिएको प्रजिअ निरौलाले बताए ।

करिब एक हप्ताअघि पत्रकार महासंघ धनुषाबाट नेपाली सेनाको टोलीले २१ जना पत्रकारको स्वाब संकलन गरेर लगेको थियो । जसमध्ये एक जनामा संक्रमण पुष्टि भएको हो ।

संक्रमित पत्रकारको परिवार र कार्यालयमा रहेका सबैको स्वास्थ्य परीक्षण गर्ने तयारी गरिएको छ ।

मंगलबार नै वीरगञ्जका दुई जना पत्रकारमा संक्रमण पुष्टि भएको थियो।