पपुवा न्युगिनीसँगको खेलमा टस जितेर ब्याटिङ रोज्यो नेपालले

काठमाडौं– ओमनमा नेपाल र पपुवा न्युगिनीबीचको दोस्रो मैत्रीपूर्ण खेल सुरु भएको छ। ओमनको अल इमिरेत मैदानमा भर्खरै खेल सुरु भएको हो।

नेपालले टस जितेर ब्याटिङ राजेको छ र ओपनिङमा ब्याटिङ गर्ने जिम्मेवारी कुशल भुर्तेल र आशिफ शेखले पाएका छन्।

पहिलो खेलमा स्थान नपाएका विकेट किपर विनोद भण्डारी, करण केसी र सुशन भारीले दोस्रो खेलमा स्थान बनाएका छन्। यता शरद भेषावकर भने टिमबाहिर छन्।

नेपालले आईसीसी विश्वकप लिग २ को तयारीका लागि पपुवा न्युगिनीसँग आज दोस्रो खेल खलेको हो। नेपालले ओपनको पहिलो पटक डे–नाइट क्रिकेट खेल्न लागेको हो।

पहिलो खेलमा नेपालले पपुवा न्युगिनीलाई दुई विकेटले हराएको थियो। आज दोस्रो खेलमा पनि जित निकाल्दै नेपाली टिम दुई खेलको सिरिजमा क्लिन स्विप गर्ने योजनामा छ। यता पपुवा न्युगिनी पनि आजको खेलमा जित निकाल्दै सिरिज बराबरी गर्न चाहन्छ।

यी दुई मैत्रीपूर्ण खेलपछि अमेरिका र घरेलु टिम ओमनसँग २–२ खेल खेल्नेछ। लिग २ अन्तर्गतको त्यो खेल अर्को वर्ष भारतमा हुने एकदिवसीय विश्वकपको छनोटसमेत हो।