उदयपुरमा १२ र चितवनमा दुई जनामा कोरोना संक्रमण, संक्रमितको संख्या ३० पुग्यो

काठमाडौं- उदयपुरमा रहेका १२ जना भारतीय नागरिकमा कोरोना संक्रमण भएको पाइएको छ।

त्रियुगा नगरपालिकाको भुल्के नजिक मस्जिदमा रहेका १२ जना भारतीयको कोसी अस्पतालमा पीसीआर परीक्षण गर्दा कोरोना संक्रमण भएको पाइएको हो। उनीहरुको थप परीक्षणका लागि स्वाब संकलन गरी  राष्ट्रिय प्रयोगशाला, काठमाडौं पठाइएकोमा त्यहाँ पनि पोजिटिभ नै देखिएको छ।

उनीहरु सबैलाई प्रदेश १ को कोरोना विशेष अस्पताल लैजाने तयारी भइरहेको छ। प्रदेश १ मुख्यमन्त्री तथा मन्त्रिपरिषदको कार्यालयका अनुसार विशेष अस्पतालमा चिकित्सक टोली तथा सबै उपकरण तयारी अवस्थामा छन्।

त्रियुगाका स्थानीयले मस्जिदमा विदेशी आएर बसेको भन्दै प्रहरीलाई सूचना गरेपछि उनीहरुको स्वाब परीक्षण गरिएको थियो। उनीहरू सबै पुरुष हुन्।

यस्तै चितवनमा पनि थप दुई जनाको पीसीआर परीक्षण गर्दा कोरोना संक्रमण भएको पुष्टि भएको छ। भाइरस संक्रमण हुने दुवै जना  एक महिना अगाडि विदेशबाट आएका र कन्ट्याक ट्रेसिङ गर्दा पत्ता लागेको भरतपुर कोरोना अस्थायी अस्पतालका चिकित्सक भोजराज अधिकारीले जानकारी दिए।

योसँगै नेपालमा कोरोना संक्रमितको संख्या ३० पुगेको छ। यीमध्ये एकजना निको भइसकेका छन्।