विपन्नलाई खाद्यान्न सहयोग

जनकपुरधाम- कोरोना संक्रमण रोकथाम गर्न लागू गरिएको ‘लकडाउन’ लम्बिँदै जाँदा गरिब तथा विपन्नहरु समस्यामा पर्न थालेका छन्।

स्थानीय तहहरुले नामावली संकलन गरेपनि कतिपय गरिब तथा विपन्न परिवारहरुले राहत पाउन सकेको छैनन्।

सरकारी राहत कुरेर बसेका गरिब तथा विपन्न परिवारहरुलाई जनकपुरका समाजसेवी दीपेन्द्र ठाकुरले खाद्यान्न सहयोग गरेका छन्।

जनकपुरका दर्जनौं गरिब तथा विपन्न परिवारहरुलाई खाद्यान्नलगायतका सामग्री सहयोग गरिसकेका ठाकुरले मंगलबार महोत्तरीको विभिन्न गाउँ पुगेर सहयोग गरेका छन्।

ठाकुरले महोत्तरीको पिपरा गाउँपालिकाको दोनौली, पिपरा गाउँपालिकाको मुकाम पिपरा, जलेश्वर नगरपालिकाको सारी र जनकपुरस्थित यज्ञवल्क्य संस्कृत विद्यालयमा खाद्यान्न सामग्री सहयोग गरेका छन्।

मंगलबार ५० भन्दा बढी घुरधुरी गरिब तथा विपन्नहरुलाई चामल, दाल, आलु, खाने तेल, नुनलगायतका सामग्री वितरण गरिएको उनले जनाएका छन्।

लम्बिँदै गरेको ‘लकडाउन’ का कारण गरिब तथा विपन्न परिवारहरु समस्यामा परेको देखेपछि केही भएपनि सहयोग गर्ने उद्देश्यले खाद्यान्न सामग्री वितरण गरेको उनले बताए।