कोरोना परीक्षणका लागि प्रभावकारी ‘आरटीपीसीआर’मेसिन धनगढी ल्याइयो

धनगढी – सुदूरपश्चिम प्रदेशमा एकै पटक धेरैको कोरोना परीक्षण गर्न मिल्ने आरटीपीसीआर मसिन ल्याइएको छ। नेपाली सेनाको स्काईट्रकमार्फत उक्त मेसिन धनगढी ल्याइएको छ।

कृषि तथा पशुपंछी विकास मन्त्रालयअन्तर्गतको केन्द्रीय पशुपंछी रोग अन्वेषण प्रयोगशालामा रहेको उक्त मेसिन आज धनगढी ल्याइएको हो। मेसिनले तीन घण्टामा ९६ जनाको स्वाब परीक्षण गर्ने क्षमता राख्छ। मेसिनलाई आजै पशुपंछी रोग अन्वेशण प्रयोगशाला धनगढीमा जडान गरी नमुनाहरुको परीक्षण सुरु गरिने भएको छ।

प्रदेशमा कोरोना संक्रमणको जोखिम बढी भएको तर, संकलित नमुना परीक्षणमा समस्या हुन थालेपछि प्रदेश सरकारको अनुरोधमा सो मेसिन धनगढी ल्याइएको हो। सुदूरपश्चिममा संक्रमितको संख्या बढ्न थालेको भन्दै सरकारले मंगलबारदेखि यहाँ र्‍यापिड टेस्ट पनि गरिरहेको छ।

यसैबीच सोही स्काईट्रकमार्फत १ सय ४० जनाको नमूना पनि परीक्षणका लागि काठमाडौं लगिएको छ।