विश्वभर १२ लाखभन्दा बढी कोरोना संक्रमित, मृतकको संख्या ६४,७००

कोरोना भाइरसबाट संक्रमितको संख्या विश्वभर १२ लाख नाघेको छ। बीबीसीका अनुसार यो संख्या बढ्दो क्रममा छ।

यस महामारीबाट ज्यान गुमाउनेको संख्या ६४ हजार ७ सय नाघेको छ । बढी ज्यान गुमाउनेमा इटाली, फ्रान्स, स्पेन र अमेरिकाका नागरिक छन्।

इटालीमा हिजो शनिबार ६८१ जनाको मृत्यु भएको छ। त्यहाँ मर्नेको कुल संख्या १५ हजार ३ सय ६२ पुगेको छ।

उता, स्पेनमा एकैदिन ८ सय ९ जनाको मृत्यु भयो । त्यहाँ मृतकको संख्या ११ हजार ९ सय ४७ पुगेको छ।

अमेरिकामा मृतकको संख्या ८ हजार ४ सय नाघेको छ। न्युयोर्कमा मात्रै एकैदिनमा ६ सय ३० जनाको ज्यान गएको छ। संक्रमितको संख्या अमेरिकामा ३ लाख भन्दा बढी छ। राष्ट्रपति डोनाल्ड ट्रम्प स्वयंले कोरोना भाइरसबाट सयौंको ज्यान जानसक्ने बताएका छन्।

उता, बेलायतमा एकैदिनमा ७ सय ८ जनाको मृत्यु भएको छ । आज बेलायतकी महारानी एलिजाबेथले देशबासीका नाममा सम्बोधन गर्दैछिन् ।

भारतमा पनि महामारी फैलिँदो छ । अहिलेसम्म ७५ जनाको ज्यान गएको छ भने ३११३ संक्रमित छन् ।